Шпанската влада го блокираше спојувањето на две домашни банки вредно 12,23 милијарди евра
Шпанската влада се противи на спојување помеѓу Банко Билбао (Banco Bilbao Vizcaya Argentaria – BBVA) и нејзиниот помал ривал Сабадел поради можното негативно влијание врз финансискиот систем, работниците и клиентите, изјави во четвртокот министерот за економија Карлос Куерпо.
ББВА, втората по големина шпанска банка, во четвртокот на акционерите на Сабадел им претстави понуда за преземање вредна 12,23 милијарди евра, откако доби „отфрлање“ од нејзиниот одбор на директори.
И владата сигнализираше црвено светло, а министерот за економија објасни дека спојувањето на двете банки може негативно да се одрази на шпанскиот финансиски систем, а последиците може да ги почувствуваат и клиентите и работниците.
Министерството за економија може да ги блокира трансакциите за спојување и преземање банки според шпанскиот закон. Владата мора да донесе конечна одлука најдоцна шест месеци по завршувањето на консултациите со регулаторите, вклучително и централната банка и регулаторот за хартии од вредност ЦНМВ.
„Ја отфрламе таа операција, по форма и содржина, поради тие можни негативни последици“, рече министерот Куерпо.
Претседателот на ББВА, Карлос Торес, во четвртокот изјави дека спојувањето ќе биде поттик за шпанската економија бидејќи ќе генерира поголема даночна основа и ќе создаде посилен европски играч.
„Убеден сум дека владата ќе ја види вредноста на трансакцијата“, рече Торес во разговорот со инвеститорите.