Македонската тенисерка, Магдалена Стоилковска денеска приреди изненадување на фјучрсот во Шарм Ел Шеик, каде во три сета ја елиминира првата носителка на турнирот.
Стоилковска преку квалификациите влезе на главниот турнир, а во денешната пресметка остана на теренот речиси три часа и со голема борбеност ја победи Адитија Карунаратне од Хонг Конг.
Противничката го доби првиот сет со 6:2, но Стоилковска возврати со 6:4, за последниот сет да донесе драматичен тај-брејк, во кој подобро се снајде Македонката.
Стоилковска го продолжува настапот во осминафиналето, а таму ќе се сретне со Италијанката Џулијана Бестети, која има нешто подобар рејтинг од нашата тенисерка.
Турнирот во Египет се игра за награден фонд од 15.000 долари.
