Системот за кочење во автобусот на „Дурмо Турс“ не бил активиран, гласи еден од главните заклучоци на супервештачењето за сообраќајката кај Ласкарци во која животот го загубија 16 патници, а повредени беа 37. Според роднините на жртвите, тоа покажува дека вештачењето е нарачано и целта е да се исклучи вината на сопственикот на „Дурмо Турс“, Белули и обвинетите од станицата за технички преглед, а единствно виновен да биде возачот Трифуновски.
Обвинителот Дарко Јакимовски, преку серија прашања, се обиде да го оспори кредибилитет на четворицата вештаци кои го правеа машинскиот дел од супервештачењето. Адвокатите бурно реагираа, па на моменти беше и тензично во судницата. Јакимовски праша зошто само еден од вештаците има дипломирано на насока за моторни возила и механизација, а другите се со поинакви специјализации. Праша и зошто од 70 страни вештачење, само на седум има заклучоци и став на вештаците, а се друго е транскрипција од преходните вештачења.
Вештакот Зекири Зекирија одговори дека не е битно на колку страни е, туку што е напишано и смета дека тоа е доволно и соодветно. Јакимовски преку прашањата фрли сомнеж и дека селективно ги применувале и анализирале доказите. Адвокатите на обвинетите, прашањата на обвинителот ги нарекоа бесполезни и непотребни, а вештаците компетентни. Роднините на жртвите, пак, сметаат дека одбраната направила циркуз од судењето со дозвола на судијката, а дека обвинителот е единствена позитивна точка во овој судски процес.
Во судница треба да дојдат и тројцата вештаци за сообраќајното супервештачење. Судењето за сообракајната несрека кај Ласкарци поради супер вештачењето беше во застој 1,3 години.
Елена Ивановска Мукоска