Изјава на Талат Џафери, технички премиер

Претседателот на техничката Влада, Таљат Џафери утрово гласаше на избирачко место со гостиварско Форино, по што даде изјава за медиумите во која истакна:

„Денес го искористив правото на глас на претседателските избори и изборите за пратеници во Собранието. Уверен сум дека и денешниот изборен ден ќе помине во најдобар ред и дека денес ќе биде ден на славење на демократијата и продолжувањето на нашиот европски пат. Впрочем граѓаните покажаа високо ниво на култура во гласачкиот процес уште на 24 април. Нема причина поинаку да биде денес. Во крајна инстанца граѓаните се свесни за значењето на изборниот процес и ја имаат сета слобода да си ја изразат волјата во кутиите. Со тоа фактички го даваат гласот за оној кандидат на којшто мислат дека ги исполнува нивните очекувања“.