Наместо одговор на легитимно поставено новинарско прашање за работата на топланата Скопје, Север, директорот Куштрим Рамадани упати груби навреди и омаловажувања кон новинарката Катерина Додевска од МКД.мк, информираат од Здружението на новинари на Македонија.
-Во телефонски разговор помеѓу колешката Додевска и директорот Рамадани, поврзан со тема околу дозволите на оваа топлана, Рамадани на груб начин со недоличен речник ја пцуе новинарката со зборовите Пи*ка ти материна… матер ти е*ам! - реагираат од ЗНМ.
Од Здружението алармираат дека таквиот однос кон новинарите и медиумските работници од страна на одговорни лица е недозволив и непримерен.
-Лична пресметка со новинарите или медиумските работници во ниту еден случај не може да биде оправдана и затоа овој однос може да води кон самоцензура. Ваквиот однос претставува и притисок на слободата на информирањето на јавноста и загрозување на јавниот интерес. Директорот Рамадани исто така, според разговорот објавен на мкд.мк, се заканува со тужба на новинарката Додевска без никаква основана причина што дополнително говори за нискиот капацитет за професионална комуникација - се наведува во соопштението на ЗНМ.
Од Здружението на новинари истакнаа дека стојат на располагање на колешката Додевска за бесплатна правна помош и за застапување на суд во врска со овој случај.
