На 18 мај во Саудиска Арабија, Александер Усик и Тајсон Фјури, ќе одлучат кој е моментално најдобриот боксер во тешка категорија во светот. Сите титули во тешка категорија се маса и по 25 години светот за првпат ќе добие апсолутен шампион.
За овој натпревар проговори и поранешниот шампион Ентони Џошуа. Британскиот боксер смета дека Усик ќе излезе како победник од овој натпревар, бидејќи е многу добро запознаен со неговите квалитети.
- Се борев со Усик и добро знам што доживеав во борбата со него. Тој е феноменален боксер и верувам дека ќе заврши многу добра работа. Од друга страна, никогаш не сум се борел со Фјури и не знам како е да се соочиш со него. Сепак, поради она што го знам, морам да кажам дека верувам во победа на Усик, изјави Ентони Џошуа.
Џошуа би сакал да му се реваншира на Усик за двата пораза, сепак, знае дека навивачите не сакаат да го видат тоа.
- Секако дека би сакал повторно да се борам со Усик, но не верувам дека тоа е она што го сакаат фановите во овој момент. Би сакал да се борам со Руиз, но убеден сум дека навивачите би сакале да ме видат против Тајсон Фјури, изјави Ентони.
Џошуа ги загуби светските титули од Руиз и од Усик. Американецот го шокираше во 2019 година во Медисон Сквер Гарден, но во декември истата година во Саудиска Арабија ги врати појасите.
Сепак, Усик го декласираше Џошуа во септември 2021 година среде Лондон. Тој во 12 рунди целосно го оддалечи и му ги одзема титулите. Реваншот, кој се одигра во Саудиска Арабија во август 2022 година, исто така го доби украинската машина. Повторно беше доминантен, но еден судија изненадувачки му ја подари победата на Британецот.
По тој пораз, Еј Џеј се посвети максимално на тренинзите. Тој се врати во стил со четири последователни победи и сега го чека човекот со кој ќе се соочи на стадионот „Вембли“ во септември. Негови потенцијални противници се Филип Хрговиќ, Даниел Дубоа, Жилеј Жанг и Деонтеј Вајлдер. Одлуката ќе биде донесена во јуни.
Џошуа во својата кариера има биланс од 28 победи, од кои 25 со нокаут и три пораза.
