Носителот на пратеничката листа во шестата изборна единица од коалицијата „Вреди“ и актуелен градоначалник на Тетово, Билал Касами, денеска посочи дека дозвола за одржување на митингот добиле од Општина Тетово, за која рече, е единствената институција одговорна за јавните простори. Од ДУИ и вчера порачаа дека немаат намера да се откажат од плоштадот „Илирија“ за одржување на завршниот митинг
Ниту коалицијата „Европски фронт“ ниту „Вреди“ не попуштаат околу тоа кој ќе го одржи завршниот митинг в понеделник на плоштадот во Тетово. И двете коалиции остануваат на ставот дека последните пораки до своите поддржувачи, пред изборниот молк во вторник, ќе ги испратат токму од плоштадот „Илирија“.
Носителот на пратеничката листа во шестата изборна единица од коалицијата „Вреди“ и актуелен градоначалник на Тетово, Билал Касами, денеска посочи дека дозвола за одржување на митингот добиле од Општина Тетово, за која рече, е единствената институција одговорна за јавните простори.
„Коалицијата ‘Вреди’ ќе организира завршен митинг на 6 мај во Тетово. Согласно законот, коалицијата се обрати во Општина Тетово, како единствена институција одговорна за јавните простори, плоштадите и другите јавни простори и Општина Тетово има дадено позитивно мислење, односно одобрување за користење на плоштадот на 6 мај“,
рече Касами.
Според него, опонентот, коалицијата „Европски фронт“ на ДУИ побарала дозвола од Општината откако веќе бил закажан завршниот митинг на „Вреди“ и посочи дека организаторите немаат обврска да ја информираат полицијата за организирање вакви собири.
„После тоа се обрати коалицијата на ДУИ, која ја информиравме дека за тоа време плоштадот е веќе зафатен и даден е на друга организација, односно друга коалиција. Завршено е времето кога дозвола за организирање се земаше од полицијата, според законот и според Уставот ние сме европска држава и за организирање на вакви собири се информира само полицијата или ако се чита прецизно, законот вика организаторот може да ја информира полицијата, значи никој од организаторите нема обврска да ја информира полицијата и не е полицијата таа која одлучува кој ќе оганизира митинзи“,
посочи Касами.
Тој упати апел до „Европскиот фронт“ да се повлечат од одржување на завршниот митинг на 6 мај во Тетово бидејќи, според Касами, се работи за провокација на тетовчани од страна на Артан Груби.
„Ја повикуваме коалицијата на ДУИ, го повикуваме лично Артан Груби да се повлече од оваа провокација на граѓаните, оваа провокација на тетовчани затоа што одговорот ќе го добие на 8 мај. Целата процедура е според законот и не може Артан Груби да кажува кој каде ќе организира митинзи, затоа што по оваа логика може да дојде во секој дом, во секој двор и да каже ова е мој двор. Законот еднаш засекогаш треба да важи за сите подеднакво“,
дециден беше Касами.
Арбр Адеми од ДУИ деновиве преку соопштение информира дека „Европскиот фронт“ прв добил потврда и дозвола од Секторот за внатрешни работи за одржување завршна средба со граѓаните на плоштадот „Илирија“. Тој посочи дека 10 дена откако СВР Тетово го прифало барањето, албанската опозиција на 22 април се обратила со барање, со кое, според Адеми, СВР Тетово како надлежен орган кој дава дозволи за вакви активности, ги известува дека не можат да организираат ваков собир.
Од ДУИ и вчера порачаа дека немаат намера да се откажат од местото на одржување на митингот.