„На 18 април преку единствениот број за итни случаи 112 во Центарот за управување со кризи, а подоцна и преку официјалната електронска пошта на ЦУК и до директорот Стојанче Ангелов, пристигна барање за воздухопловен транспорт од Унгарија до Македонија на болно лице, македонски државјанин, кој во Унгарија доживеал мозочен удар, па повеќе денови бил во болница во Унгарија, во градот Сегед“, информираат од ЦУК
Успешен транспорт на македонски државјанин од Унгарија до Северна Македонија бил реализиран денеска со полициски хеликоптер на МВР, опремен со посебна медицинска опрема, соопшти Центарот за управување со кризи.
Станува збор за лице кое било на службен пат во Унгарија и доживеало мозочен удар, по што веднаш било сместено и оперирано на Универзитетската клиника во Сегед, а денеска е транспортирано и хоспитализирано во Клиничкиот центар во Скопје.
„На 18 април преку единствениот број за итни случаи 112 во Центарот за управување со кризи, а подоцна и преку официјалната електронска пошта на ЦУК и до директорот Стојанче Ангелов, пристигна барање за воздухопловен транспорт од Унгарија до Македонија на болно лице, македонски државјанин, којшто во Унгарија доживеал мозочен удар, па повеќе денови бил во болница во Унгарија, во градот Сегед. Притоа, на барањето е одговорено веднаш и по создавањето услови за безбеден транспорт, тоа е реализирано од страна на Хеликоптерската единица на МВР со хеликоптерот „бел“ 412, во содејство со Министерството за здравство“,
информира ЦУК.
Во овој тип случаи, при помош на граѓани, полициските хеликоптери со мали модификации и опремување со специфична опрема, се употребуваат повеќенаменски, односно покрај за гаснење пожари, сега се употребуваат и за медицински транспорт, објаснуваат од ЦУК.
Инаку, ова е вторпат да се извршува таков вид воздухопловен транспорт од Сегедин до Скопје, по првиот пат што успешно се реализира на 11 април.