Во периодот од 1 до 7 март се регистрирани 50 нови случаи на голема кашлица, според последниот извештај на Институтот за јавно здравје. Од нив, пет лица се хоспитализирани, од кои четири се помали од една година, а едно спаѓа во категоријата на лица од една до четири години.
Најголем дел од заболените лица имаат меѓу 10 до 14 години, а најстарите имаат 40 години.
Според извештајот, заклучно со 7 март, во државата се регистрирани вкупно 173 случаи на голема кашлица. Од нив, 102 случаи, или 59 отсто, не биле вакцинирани, не се комплетно вакцинирани согласно возраста или нема доказ за вакцинација.
Сепак, во четвртокот министерот за здравство Илир Демири најави дека повеќе од 22.000 деца се вакцинирале со ДиТеПер вакцината во рок од еден месец.
Според препораките на Комисијата за заразни болести од понеделник во градинките нема да се примаат децата кои не се вакцинирани со ДиТеПер, а од Државниот здравствен и санитарен инспекторат најавија засилени инспекциски контроли.
