Делови од Амазон се соочуваат со сериозни притисоци кои би можеле да доведат до неповратни промени до 2050 година, предупредуваат научниците.
Студијата објавена во списанието Nature покажува дека до средината на векот, 10% до 47% од шумите во Амазон ќе бидат сериозно загрозени од комбинација на фактори како што се глобалното затоплување, променливите врнежи, подолгите суви периоди и уништувањето на шумите и пожарите.
Ваквиот колапс на шумските екосистеми не само што потенцијално би предизвикал дополнителни климатски промени, туку би имал и сериозни последици за локалните заедници и дивиот свет во регионот, вклучително и повеќе од 10% од копнените видови, пишува The Guardian.
Иако амазонската прашума е клучно живеалиште за многу животински видови и игра важна улога во складирањето на јаглеродот и регулирањето на климата, отпорноста на шумите во регионот опаѓа од раните 2000-ти, се истакнува во студијата.
Ситуацијата не е идеална
Како главна закана за Амазон, научниците ги идентификувале зголемените температури, зголемениот број на сушни денови и промените во обрасците на врнежите.
Околу 38% од преостанатите амазонски шуми веќе се сериозно деградирани поради уништувањето на шумите, пожарите и екстремните суши, а патните мрежи дополнително придонесуваат за оштетување на сржта на екосистемот.
Според предвидувањата, до 2050 година, голем дел од Амазон би можел да претрпи трансформација во савани или деградирани шуми, што сериозно ќе ја загрози функцијата на Амазон како складиште на јаглерод и значително ќе ги влоши локалните влијанија од климатските промени.
За да се спречи натамошно влошување на ситуацијата, научниците ја нагласуваат потребата итно да се запре уништувањето на шумите и да се намалат емисиите на стакленички гасови.
Одржувањето на амазонската шума во безбедни граници бара комбинација од локални и глобални напори, со потреба да се обноват најмалку 5% од изгубените области.
