Во Европскиот парламент беше одбележана 20-годишнината од најголемото проширување на Европската унија, а актуелните и поранешните европски лидери ја истакнаа важноста од натамошното проширување на ЕУ.
Кипар, Чешка, Естонија, Унгарија, Латвија, Литванија, Малта, Полска, Словачка и Словенија се приклучија на Европската унија на 1 мај 2004 година. Тоа беше петто и најголемо проширување во историјата на ЕУ.
Претседателката на Европската комисија, Урсула фон дер Лајен, на формалната седница на ЕП рече дека желбата за обединување на Европа и комплетирање на ЕУ е денес поважна од кога било досега.
„Западниот Балкан е се поблиску до нас. Донесовме историска одлука за почеток на преговори со Украина и Молдавија, додека народот на Грузија не ги кријат своите европски соништа. Треба да се радуваме на идното проширување додека го славиме успехот во изминатите 20 години“, рече Фон дер Лејен.
Претседателот на ЕК истакна дека она што се случува во Украина засекогаш ќе ја обликува иднината на Унијата и дека Русија претставува „егзистенцијална закана не само за Украина, туку и за Европа“.
„Има само еден начин да се соочиме со ова. Има само еден јазик што Путин го разбира. А тоа е: обезбедување на Украина со средства за одбрана“, рече фон дер Лајен.
Кој ќе одлучува за иднината на Европа ќе зависи од одлуките што ЕУ ќе ги донесе во наредните денови, недели и месеци, рече Фон дер Лајен и повика на единство, поддршка за Украина и амбиција во однос на проширувањето и реформите.
Претседателката на Европскиот парламент Роберта Мецола истакна дека трансформативниот ефект на проширувањето врз животот на генерациите Европејци е несомнен и е евидентен во секоја земја-членка.
Мецола додаде дека земјите од Истокот со нетрпение го очекуваат истиот процес и дека Европа не може да погледне настрана.
На свечената седница на ЕП се обратија Пет Кокс и Романо Проди, кои беа претседатели на Европскиот парламент и на Европската комисија во времето на големото проширување, како и претставници на 10-те земји кои станаа членки пред 20 години.
Проди рече дека сега има нови земји кои сакаат да влезат во ЕУ и дека мора да им се даде позитивен одговор.
Тој додаде дека мора да се поедностават и правилата што ја регулираат Европа.
Поранешниот претседател на ЕП Кокс рече дека Унијата треба институционално и финансиски да се подготви за прием на нови членки и дека треба да биде отворена за сите европски земји кои споделуваат основни вредности и кои сакаат да бидат дел од европското семејство.
„Што се однесува до идните проширувања, денешниот настан е потсетник дека успешно сме го направиле тоа претходно, а денешната порака треба и мора да биде дека можеме и ќе го направиме тоа повторно“, рече Кокс.