Голема ѕвезда на Баерн со загрижувачка изјава: Осамен сум во Минхен, јас сум познат губитник

Алфонсо Дејвис е голема ѕвезда на Баерн Минхен и во само неколку сезони се наметна како најдобар лев бек во светот, но иако работите изгледаат совршено за него на фудбалскиот терен, надвор од него не е толку задоволен.

Дефанзивецот ја искористи интернационалната пауза за да се отвори за својот приватен живот во Минхен, па со тоа малку се оттргна од редовните натписи во Германија кои се посветени само на Томас Тухел и Јулијан Нагелсман.

Тренерската смена во Баерн е топ тема во Германија, но раководството на Баерн треба да биде загрижено и од изјавата која ја даде младиот фудбалер за кој веќе сериозен интерес има пројавено Реал Мадрид.

– Навистина е малку загрижувачки тоа што немам што да правам после тренинзите и натпреварите. Сите пријатели си имаат работа и се чувствувам осамено.

– Животот на професионален фудбалер е генијален за да се опуштите и уживате, но вистината е дека сум осамен. После тренинзите, немам што да правам во останатиот дел од денот. Бидејќи семејството и мојата девојка не се тука, навистина се чувствувам осамено. Најверојатно имам само пет вистински пријатели, јас сум познат и популарен губитник, – вели Дејвис.