Николоски: Имам сознанија дека има и други случаи како Онишченко во Македонија
Потпретседателот на ВМРО-ДПМНЕ, Александар Николоски гостуваше во вечерашното издание на емисијата „Тема на денот” на Сител телевизија и истакна дека за случајот Онишченко е прекршен законот за кој вели дека мора да се направат безбедносни проверки и да се направи интервју со лицето, а тој само два дена бил претходно во Македонија.
„Ова воопшто не е наивен случај, ниту е сѐ случајно. Имено, за кое било лице да добие државјанство, кое не е родено во Македонија, мора да се направат безбедносни проверки, но и интервју со лицето, а за да се направи тоа тој мора да е физички присутен во државата. Онишченко вкупно во Македонија пред да добие државјанство, а тоа го добива на 31 мај 2022 година, бил само два дена во Македонија, во декември 2020 година и во април 2022 година, а државјанство добива мај следна година. Во периодот измеѓу не бил присутен што значи прекршен е законот кој вели мора да се направи безбедносна проверка, но исто така и разговор односно интервју“, рече Николоски.
Николоски потсети дека и самата влада кажа дека има пропусти поради неточни податоци и дека тоа е одговорност на МВР.
„Потписот е спротивен на неговото име кое е на О, а потписот на А, веројатно свесен дека прави нешто на работ на законот и затоа покрај одговорност на директорот на АНБ одговорност мора да поднесе и министерот за внатрешни работи и премиерот“, потенцираше Николоски.
Николоски истакна дека има и уште неколку вакви спорни случаи за кои не е направена безбедносна проверка, во случен период и со слично прескокнување на процедурата.