Stefano Boeri Architetti: „Летечки градинари“ ќе се грижат за зградата која има зеленило како за еден хектар шума

Откако проектот Bosco Verticale доби бројни пофалби, италијанското студио Stefano Boeri Architetti, ширум светот постојано проектира згради прекриени со растенија. Нивниот придонес во популаризација на овој тренд е многу значаен, а за најновиот проект студиото најавува користење на илјадници растенија и стотици дрвја. Според авторите на проектот, ова може да се спореди со евгетацијата која се наоѓа на еден хектар шума. Изградбата на облакодерот наречен The Wonderwoods Vertical Forest привршува, а покрај него ќе се најде уште еден помал. Лоциран во Утрехт, Холандија, повисокиот облакодер ќе има височина од 105m и во него ќе се најдат 200 станови од различен тип и 15.000m2 деловен простор. Од Stefano Boeri Architetti истакнуваат дека на терасите ќе има големи жардињери со околу 10.000 растенија и 300 стебла, па станарите ќе може навистина да уживаат во зеленилото. Овој урбан екосистем е инспириран од Националниот парк во Утрехт и ќе може да произведе околу 41 тон кислород годишно.

Уште една предност, според авторите е пригушувањето на бучавата кое го обезбедуваат овие растенија. Тие ќа ја заштитуваат зградата и од загревање во текот на летото, па трошоците за климатизација ќе бидат пониски, а ќе имаат и значително влијание врз микроклимата. Како и кај сличните проекти од ова студио, за зеленилото ќе се грижат „летечки градинари“ кои ќе се спуштаат од врвот на зградата. Сеуште не е објавено дали ќе постои систем за собирање на дождовницата, како што тоа е случај во претходните проекти од ова студио. Проектот треба да биде комплетно завршен до средината ан 2024 година.