Претседателот на Колумбија, Густаво Петро, најави дека ќе ги прекине дипломатските односи со Израел од четврток поради неговите постојани напади врз палестинскиот народ во Појасот Газа.
Петро, кој присуствуваше на прославата за 1 мај што се одржа во главниот град Богота, се обрати до јавноста на плоштадот Боливар.
По тој повод Петро најави дека утре ќе бидат прекинати дипломатските односи со државата Израел, „поради геноцидниот лидер и Владата“.
Нагласувајќи дека Израел извршил геноцид во Газа, Петро рече:
– Целото човештво што денеска излезе на улица се согласува со нас: Не можеме да се вратиме во ерата на геноцидот. Не можеме да стоиме настрана и да гледаме како се уништува цел народ пред очите на човештвото. Ако умре Палестина, умира и човештвото.
Петро изјави дека бебињата биле убиени во Газа во израелските бомбардирања, поради што луѓето ширум светот излегле на улиците.
Во својата изјава на 26 март, Петро најави дека ќе ги прекине дипломатските односи со Израел доколку не ја почитува одлуката на Советот за безбедност на Обединетите нации со која се бара прекин на огнот во Газа.
Израел продолжува со нападите врз Појасот Газа, каде, според палестинските власти, од 7 октомври досега се убиени најмалку 34.388 Палестинци, главно жени и деца, а 77.437 се повредени.
Војната во Израел турна 85 отсто од населението на Појасот Газа во внатрешно раселување со акутен недостиг на храна, чиста вода и лекови, додека 60 отсто од инфраструктурата на енклавата е оштетена или уништена, според Обединетите нации.
Израел е обвинет за геноцид пред Меѓународниот суд на правдата. Привремената пресуда во јануари му нареди на Тел Авив да ги запре геноцидните акти и да преземе мерки за да обезбеди хуманитарна помош за цивилите во Газа.
