Претседателките на Академијата за судии и јавни обвинители и на антикорупциската комисија повторно ги вкрстија копјата, овој пат на рочиште во Управниот суд, околу тужбата по одлуката на антикорупционерите донесена во средата дека Академијата ги прекршила законите со тоа што не го стопирала процесот на селекција на кандидати. И подносителот на приговорот до Антикорупциска, претседателскиот кандидат од редовите на ВМРО – ДПМНЕ, Гордана Силјановска – Давкова исто така се обрати пред судскиот совет за да ги аргументира причините поради кои се обратила до антикорупционерите.
Академијата поднесе тужба на одлуката на Антикорупциска со образложение дека составот кој ја донел одлуката е спорен бидејќи не биле изземени три члена поради судир на интереси, а според Габер неодложноста за прием и тестирање на кандидати се должи на фактот што во 2022 година голем број судии заминале во пензија како и непредвидливоста кога ќе се заврши изборниот процес со формирање на Влада.
Претседателката на Антикорупциската комисија нагласи дека одлуката на која се повикува Академијата е донесеа од друг состав на комисијата и во други услови и затоа не може да се земе како меродавна.
Претседателскиот кандидат Гордана Силјановска – Давкова пак во своето обраќање кажа дека тужбата на Академијата е само одолговлекување и обид тековниот процес да се стави во мирување.
Судијката Ана Герасимовска ќе ја соопшти пресудата вечерва во 22 часот.
Огнен Чанчаревиќ