Министерот Меџити чекал извештај за сработеното од проф д-р Јовев па затоа го разрешил

05/06/202305/06/2023 Портал Работник

Време за читање 1 минута

Министерот за здравство Фатмир Меџити во изјава за новинарите ја потврди веста која ексклузивно ја објави МКД.мк – дека го разрешил од директорската позиција во Државна кардиохирургија проф.д-р Сашко Јовев, кој ги предводеше тимовите кои ги извршија првите трансплантации на срце во Македонија. Меџити очекувал од Јовев извештај за сработеното.

„Веќе нема да има директори кои седат и спијат по 5 – 10 години и немаат никаков резултат. Затоа здравството ни е во ваква амортизирана состојба. Секогаш кога ќе има нерегуларности во работењето и во сѐ другото, јас вака ќе постапам. Ова е само почеток, ќе видите понатаму со мене како министер нема некој да седи шест месеци и да нема извештај за сработеното“, рече Меџити.

Според министерот позицијата директор на државната Кардиохирургија била на СДСМ, но и дека ќе има друг предлог.

„Ова се транзициски позиции и нема овде никој вечен на функцијата, ниту јас, ниту директорите, рече Меџити одговарајќи на новинарски прашања откако беше промовирана е-услуга за регистрација на новороденче.

Министерот не кажа што за македонското здравство има постигнато проф д-р Сашко Јовев, ниту дека ја запиша Македонија на мапата на земји во светот каде успешно се вршат трансплантации на срце, а не ги спомена ниту државните награди за постигнувања во медицинската наука.

Неофицијално, нов директор ќе биде Ваљон Асани, кој е интервентен кардиолог, а не е кардиохирург.