Мемоарите што ги напиша рускиот опозициски лидер Алексеј Навални пред неговото затворање и смртта ќе бидат објавени во октомври оваа година.
Политичкиот активист „сам напиша цели мемоари“, изјавија за Би-Би-Си претставници на издавачката куќа „Vintage Publishing“.
Навални почна да работи на својата книга додека се опоравуваше од труење со нервен агенс во 2020 година. Тој почина во февруари 2024 година, по три години затвор под обвиненија кои се сметаат за политички мотивирани.
Неговите мемоари ќе бидат „целосната приказна за неговиот живот: неговата младост, неговиот повик за активизам, неговиот брак и семејство, и неговата посветеност на руската демократија и слобода пред лицето на светската суперсила решена да го замолчи“, велат од „Vintage Publishing“.
Издавачот додаде дека тоа „го изразува неговото целосно уверување дека е невозможно да се одолее на промените и дека тие сигурно ќе дојдат“.
Книгата – која треба да излезе за околу шест месеци – се вели дека содржи „невидена преписка од затворот“, според „Vintage“.
Во овој дел политичарот и адвокат ја раскажува „неговата политичка кариера, многуте обиди за атентати и животите на луѓето кои му беа најблиски, како и кампањата што тој и неговиот тим ја водеа против диктаторскиот режим“.
Јулија, вдовицата на Алексеј Навални, рече:
„Оваа книга е сведоштво не само за животот на Алексеј, туку и за неговата непоколеблива посветеност во борбата против диктатурата – борба за која тој даде сè, вклучително и својот живот. Преку неговите страници, читателите ќе го запознаат човекот што длабоко го сакав – човек со длабок интегритет и непопустлива храброст“.
Таа рече дека споделувањето на неговата приказна ќе го почитува неговото сеќавање и „да ги инспирира другите да се залагаат за она што е правилно и никогаш да не ги губат од вид вредностите кои навистина се важни“.
Навални беше затворен веднаш по неговото враќање во Русија во 2021 година. Тој беше префрлен во една од најтешките руски казнени колонии на Арктикот непосредно пред неговата смрт.
Според затворската служба, тој излегол на прошетка кога изгубил свест и починал.
Книгата ќе биде објавена на 22 октомври.