Емоционално простување на Надал од публиката во Мадрид

Рафаел Надал мораше да запре неколку моменти, видно емотивен, додека ѝ се обраќаше на публиката по поразот во четвртото коло на Мадрид опен.

Додека наоколу одекнуваа скандирањата „Рафа, Рафа, Рафа“, петкратниот шампион во Мадрид одржа проштален говор по поразот со 7:5, 6:4 во вторникот од 31. рангираниот Јиржи Лехечка.

Веројатно тоа беше неговиот последен официјален натпревар на турнирот во шпанската престолнина.

„Ова е тежок ден кога ќе пристигне, но тоа е реалност. Моето тело и мојот живот ми испраќаа знаци веќе некое време“, рече Надал. „Можев да се збогувам играјќи на овој терен, еден од најемотивните за мене. Мадрид на моменти ми беше поважен од Грен слем. Спомените овде ќе останат со мене засекогаш“.

По натпреварот, организаторите на турнирот развиорија пет транспаренти за секоја од титулите на Надал во Мадрид – 2005, ’10, ’13, ’14 и ’17. Тие прикажаа и видео од неговите врвни моменти, додека неговата сопруга и сестра лееја солзи на трибините.

„Беше подарок тоа што го направи за мене во текот на 21 година кога играв овде“, рече 37-годишниот Надал, освојувач на 22 Грен слем титули во сингл. „Сè што можам да кажам е ‘благодарам’“.

Надал немаше пораз од играч кој е рангиран надвор од топ 20 на земјена подлога откако падна од Пабло Куевас во 2016 година во Рио де Жанеиро. Тој ја бараше својата 60-та победа во Мадрид и 100-тото четвртфинале на АТП 1000 во кариерата.

Претходно, на играчот за кој шпанските навивачи се надеваат дека ќе го преземе владеењето на Надал, Карлос Алкараз, му беа потребни речиси три часа за да го победи Јан-Ленард Штруф со 6-3, 6-7 (5), 7-6 (4).

Двајцата Шпанци се рехабилитираат од повреди и се обидуваат да се вратат во форма пред Отвореното првенство на Франција следниот месец. 20-годишниот Алкараз ги пропушти турнирите во Монте Карло и Барселона. Надал имаше два меча во Барселона откако не играше натпреварувачки речиси три месеци.

Тој пристигна во Мадрид велејќи дека не е целосно подготвен и дека е загрижен за неговата состојба, но на крајот победи три последователни меча без да покаже значителни физички ограничувања.

„Само два дена пред да заминам за Барселона, навистина не знаев дали ќе можам повторно да играм на официјален натпревар“, рече Надал, „и на крајот играв две недели“.

Вториот носител Алкараз имаше две удобни победи во Мадрид, но се мачеше во вторникот. Тој потроши четири меч топки против 24. рангираниот Штруф додека сервираше за 5-3, но ја претвори својата прва можност во решавачкиот тај-брејк на централниот терен на Каја Магика.

„Не бев најдобро физички кон крајот на натпреварот, но среќен сум што на крајот ја најдов мојата игра“, рече Алкараз. „Се борев за секоја топка и не изневерував и покрај некои тешки моменти кога работите не одеа како што треба. (АП)