Руските милијардери кои се најдоа под западни санкции постепено почнаа да ги преселуваат своите активности во својата татковина. Фактот дека Кипар и Швајцарија повеќе не обезбедуваат услуги за управување со семејните трустови доколку нивните основачи или корисници се руски државјани, во голема мера придонесе за ова.
Како што анонимно изјавија двајца руски милијардери за агенцијата Блумберг, префрлајќи ги своите активности во Русија, претприемачите се соочуваат со ризик од национализација на бизнисот, пренесува Комерсант. Соговорниците на агенцијата рекоа дека сега се принудени да работат само во Русија. Се трудат да не размислуваат за можноста државата да ги национализира нивните активности.
Вкупното богатство на 26 руски милијардери, чија просечна возраст е 63 години, е околу 350 милијарди долари. Со оглед на нивната возраст, милијардерите веќе планираат како ќе го пренесат своето богатство на своите наследници. Од агенцијата тврдат дека развојот на економијата и на сите бизнис сектори зависи од одлуката на овие луѓе, во која земја и на кој начин тоа ќе го направат.
Покрај тоа, некои руски милијардери чуваат значителен дел од своето богатство во готовина, кое се наоѓа на непознати места. Меѓу нив се поранешниот шеф на холдингот ФосАгро, Андреј Гурјев и главниот акционер на Лукоил – Вагит Алекперов.
Наводно Русија долго време се обидува да ги „врати“ своите милијардери, создавајќи поповолни услови за нивно пренесување на наследството. Во земјата нема данок на наследство, а има и закон за фондови за наследство. Ваквите приватни фондови овозможуваат лесно пренесување на богатството на следната генерација, автоматски распределувајќи ги нивните активности или добивки меѓу наследниците.