ЦУК: Превртената цистерна со плин кај битолското село Вашарејца ќе се отстранува денеска

РЦУК Битола извести дека вчера во 9:30 часот е добиена информација за превртена цистерна со плин во близина на битолското село Вашарејца

Цистерната со плин која беше превртена вчера во 9:30 часот во близина на битолското село Вашарејца ќе се отстранува денеска поради немање соодветна механизација, соопшти Центарот за управување со кризи (ЦУК).

„РЦУК Битола извести дека вчера во 9:30 часот добиена е информација за превртена цистерна со плин во близина на битолското село Вашарејца. На терен интервенирале комбинирано пожарникарите од ТППЕ Битола со четворица пожарникари и едно противпожарно возило, МВР – СВР Битола и Итна медицинска помош – Битола. Возачот на камионот бил лесно повреден и е пренесен во Клиничката болница во Битола“,

се наведува во соопштението.

Превртена цистерна со плин, возачот се здобил со лесни повреди

Во последното деноноќие, како што информираат од ЦУК, имало вкупно 1 988 повици на Единствениот повикувачки број за итни случаи 112. Од нив „реални“ повици биле 45,62 отсто, а 54,38 проценти биле за други потреби на граѓаните што не биле итни.

Кон полиција биле упатени 62,18 отсто, кон итната медицинска помош 34,87 проценти, a кон пожарникарите 1,27 отсто од реалните повици кон 112 во ЦУК.

Во последното деноноќие на бројот 112 во ЦУК бил пријавен само еден пожар на отворено во Скопскиот регион.