КИНА денеска остро ги отфрли обвинувањата за шпионажа со балон во воздушниот простор на САД, велејќи дека балонот отстапил од својата рута поради „виша сила“, односно ветер.
Американскиот државен секретар Ентони Блинкен оцени дека упадот на „надзорен балон“ во воздушниот простор на САД е „неприфатлив“ и „неодговорен“.
„Не прифаќаме неосновани шпекулации и сензационализам“, соопшти во саботата кинеското Министерство за надворешни работи, мислејќи на телефонскиот разговор меѓу првиот дипломат Ванг Ји и Блинкен претходниот ден.
Блинкен ја откажа посетата на Пекинг планирана за недела. Тоа ќе биде прва посета на Кина на американски државен секретар од 2018 година. Блинкен истакна дека САД сакаат каналите за комуникација со Пекинг да бидат отворени и дека посетата треба да се одржи без одлагање „кога ќе дозволат условите“.
Портпаролот на кинеското Министерство за надворешни работи повтори дека балонот што лета над САД се користи за „метеоролошки и други научни истражувања“. Тој додаде дека балонот скршнал од планираната рута поради ветерот и ограничените можности за контрола на неговиот лет.
Пентагон не го прифаќа ова.
„Знаеме дека тоа е балон за надзор“, рече Рајдер.
Министерството за одбрана во четвртокот вечерта соопшти дека го открило балонот. Откриен е над Монтана, каде што се чуваат 150 интерконтинентални балистички ракети вооружени со нуклеарни боеви глави во воена база на север, според извештајот.