Судијата во судењето за наводно подмитување на Доналд Трамп во понеделникот отпушти десетици потенцијални поротници кои рекоа дека не можат непристрасно да одлучат дали поранешниот американски претседател е виновен или невин.
На првиот ден од историското судење на поранешниот претседател, судијата Хуан Мерчан им рече на 100 потенцијални поротници дека мора да ги остават настрана сите предрасуди или лични ставови за обвинетиот или случајот, вклучувајќи ја и „политичката ориентација“.
Најмалку 50 беа отпуштени откако рекоа дека не можат да бидат непристрасни во судењето на републиканскиот претседателски кандидат. Судењето го напуштија и оние кои рекоа дека не можат да ја извршуваат таа должност од други причини.
„Едноставно не можев да го направам тоа“, се слушна како вели еден потенцијален поротник пред судницата.
Адвокатите на двете страни ќе се обидат да изберат дванаесет поротници и шест заменици во она што веројатно ќе биде единственото кривично дело со кое се соочува Трамп пред изборите на 5-ти ноември.
Изборот на поротата од луѓето на зизразениот продемократски Менхетен може да потрае неколку дена, по што ќе следуваат воведни изјави и сведочење на сведоци.
Судијата Мерчан истакна дека за да го осудат, поротниците мора да откријат дека Трамп е виновен „надвор од секое сомневање“, а не дека тој е „веројатно“ виновен.
Пресудата за вина не би го спречила Трамп да биде претседател, но половина од независните гласачи и секој четврти републиканец велат дека нема да гласаат за него доколку биде осуден, покажаа анкетите на Reuters/Ipsos.
Трамп во понеделникот се појави на судот во Менхетен. Бизнисменот кој стана политичар кој беше претседател од 2017 до 2021 година ги искористи минатите судски настапи за да ги собере своите поддржувачи и да тврди дека е прогонуван од политички непријатели.
Поранешниот американски претседател го нарече кривичното судење кое започна во Њујорк политички прогон без преседан и го обвини актуелниот шеф на државата Џо Бајден за вмешаност во него.
„Оваа земја е предводена од неспособна личност која е многу вклучена во оваа работа. Ова е напад на политички противник. Тоа е што е. Затоа, за мене голема чест е што сум овде“, рече Трамп.
Обвинителите на сојузната држава Њујорк, сите демократи, го обвинуваат за фалсификување документи за да ја прикрие исплата од 130.000 долари кон крајот на претседателската кампања во 2016 година за да купи молчење од порно ѕвездата Сторми Даниелс за нивната кратка афера во 2006 година, за која таа тврди дека се случила, а Трамп негира.
Меѓу сведоците ќе бидат Даниелс и поранешниот адвокат на Трамп, Мајкл Коен, кој сведочеше дека ѝ дал пари на Даниелс. Трамп, исто така, планира да сведочи.
Трамп се изјасни за невин и тврди дека, како и во другите судски постапки против него, е прогонуван од политички причини.
Иако некои правни експерти сметаат дека судењето е најмалку важното од четирите кривични постапки против Трамп, тој е единственото што ќе се одржи пред претседателските избори на 5-ти ноември.
