Орландо со една екстра-четвртина го демолираше Кливленд

Орландо израмни на 2-2 во плејоф-серијата од Источната конференција против Кливленд откако тимот од Флорида убедливо го доби четвртиот меч со резултат 112-89. Откако пред неколку дена славеа на домашен терен со преубедливи 121-83, „магичните“ вечерва повторно делуваа импресивно, декласирајќи го ривалот од кого загубија двоцифрено два меча на гостински терен на стартот од оваа плејоф-серија.

Една екстра-четвртина беше сосема доволна за да се скрши отпорот на гостинскиот состав. Кливленд на одмор дури и имаше предност од девет поени (51-60), но третиот период мина во апсолутна доминација на домашните кошаркари. Орландо отвори со серија од 27-5 и стигна до двоцифрена предност, а „магичните“ ја добија оваа четвртина со 37-10. Гостите беа нокаутирани, па последните 12 минути минаа во дополнително зголемување на предноста на домашниот тим, на крајот изразена со конечните „плус 23“.

Франц Вагнер одигра извонреден меч и со 34 поени и 13 скокови беше најзаслужен за оваа победа на Орландо, Исак постигна 14, а Фулц 12 поени за победничкиот тим. На спротивната страна, најефикасни кај Кливленд беа Ален со 21 и Мичел со 18 поени.

Се вчитува...