Напаѓачот од Минхен имал регуларен престој во Германија

Минхен е во шок - и во потрага е по одговори зошто е извршен нападот со автомобил на демонстрации во центарот на градот. Во нападот се повредени најмалку 30 лица, од кои дел потешко.

Осомничениот, 24-годишен Авганистанец, е уапсен и денеска треба да се појави пред истражен судија. Дали има индиции за неговиот мотив? Полицијата планира да одржи прес-конференција претпладнево. На местото каде што е извршено злосторството денеска во знак на тивко сеќавање ќе се соберат луѓе, меѓу кои ќе биде и сојузниот претседател Франк-Валтер Штајнмајер.

Шолц ветува побрзи депортации

Канцеларот Олаф Шолц изрази запрепастеност од нападот и вети дека напаѓачот брзо ќе биде депортиран во неговата родна земја. „Секој што нема германско државјанство и прави злосторства од овој вид, мора да смета со тоа дека ќе го вратиме од оваа земја, ќе го однесеме и ќе го депортираме“, изјави Шолц во вчеравечер во емисијата „Речено јасно“ на ЗДФ.

Ова експлицитно се однесува и на осомничениот, нагласи Шолц. „Сигурно ќе биде осуден од судовите и пред да го напушти затворот ќе биде вратен во родната земја“, увери канцеларот. Иако овој пристап во моментов „не е лесен“, тој ќе биде имплементиран, рече Шолц. Германија веќе организира летови за депортација во Авганистан.

Министерката за внатрешни работи Ненси Фезер исто така изјави дека депортациите во Авганистан ќе продолжат. Злосторството во Минхен допрва треба да се истражува, но веќе сега е јасно: „Повторно станува збор за млад Авганистанец, мора да реагираме со полна сила на законот“. Не може луѓето да доаѓаат во Германија и овде да прават злосторства, рече Фезер.

Дозвола за престој од 2021 година

Во текот на вчерашниот ден (13.02), кога беше извршено кривичното дело, првично постоеше неизвесност за статусот на престој на осомничениот. Вечерта стана јасно: младиот Авганистанец, според министерот за внатрешни работи на покраината Баварија, Јоахим Херман, има важечка дозвола за престој и работна дозвола. „Според досегашните сознанија, престојот на сторителот до ден денес бил апсолутно легален.“

Истовремено, министерот извести дека, според последните сознанија и спротивно на првичните информации, Авганистанецот не бил регистриран како крадец во продавница. Според Херман, Авганистанецот дошол во Германија на крајот на 2016 година како малолетник бегалец без придружба. Неговата процедура за азил конечно била завршена во 2020 година, со известување за одбивање и барање да ја напушти земјата. Сепак, главниот град на Баварија, Минхен, потоа, во април 2021 година, му издал документ со кој добил статус на толерирано лице, а во октомври 2021 година му е дадена и дозвола за престој. Младиот човек посетувал училиште, завршил стручна обука и работел како детектив во продавница во две фирми за обезбедување.

Затоа првично имало недоразбирање околу тоа дали осомничениот претходно крадел или не. Тој, според Херман, се појавил во постапки за неколку случаи на кражби. „Тој самиот не бил осомничен, туку бил сведок“, појасни Херман.

Баварскиот премиер Маркус Зедер (ЦСУ) вчеравечер за ЗДФ изјави дека осомничениот „досега бил главно незабележлив“. „Од него не се барало да ја напушти земјата“, изјави Зедер, кој нагласи дека и екстремистичката позадина на извршителите на претходните напади не била толку лесно „препознатлива на прв поглед“. Затоа, потенцира тој, сега мора да се спроведат дополнителни истражувања со цел да се открие причината за страшниот и ужасен чин.

Напаѓачот претекнал полициско возило

Според полицијата, нападот во четвртокот се случил на следниов начин: околу 10:30 часот, осомничениот возел прво зад демонстрациите, потоа претекнал полициски автомобил што требало да ја обезбеди групата, забрзал - и возел до крајот на протестната поворка, на кој неколку луѓе ги донеле и своите мали деца. Полицијата пукала кон осомничениот и го привела.

Демонстрациите беа организирани од страна на синдикатот Верди како дел од предупредувачките штрајкови во јавниот сектор. Според полицијата, во моментот кога автомобилот влетал во толпата во поворката имало околу 1.500 луѓе кои биле на пат до завршниот собир на Кенигсплац.

Синдикатот не ги откажа своите настани планирани за денеска во Баварија. Вчеравечер на местото на злосторството беше положено цвеќе и беа запалени свеќи. Возилото користено во злосторството беше однесено со шлепер. До доцна во ноќта работеа форензичари и службеници на Покраинската криминалистичка полиција.

Денеска во Минхен почнува меѓународната Конференција за безбедност, и тоа недалеку од местото на злосторството. Засега е  нејасно дали вчерашниот напад ќе има некакво конкретно влијание врз средбата на повеќе од 60 шефови на држави или влади, воени претставници и експерти.