Зошто луѓето во Европа се сè понезадоволни?

Најновата студија на глобалната консултантска фирма „Амроп“ открива значајни разлики во перцепцијата за работата помеѓу жителите на Европската Унија и оние од „Глобалниот Југ“. Истражувањето, насловено „Значењето на работата“, опфати 8.000 испитаници од осум земји, меѓу кои Германија, Франција, Полска, САД, Кина, Индија и Бразил.

Највисоко ниво на задоволство од балансот меѓу работата и приватниот живот е забележано во Индија (73,3%), додека земјите од ЕУ, како Германија и Франција, покажуваат значително пониски стапки, под 50%. Дури и САД, со релативно ниски социјални стандарди, остварија подобри резултати со 59,9% задоволство.

Европската криза: „Време е за будење“

Претседателката на „Амроп“, Аника Фарин, истакна дека Европа заостанува во справувањето со овие предизвици. „Неспремноста на Европа да преземе одговорност, како во бизнисот, така и во политиката, е повик за будење,“ изјави таа за „Еуроњуз“.

Фарин предупреди дека демографските промени, како пензионирањето на „бејби-бумерите“ и влезот на „генерацијата Z“ на пазарот на труд, ќе бараат значителни адаптации. Таа ја потенцира важноста од привлекување мигранти и преземање иновативни политики за решавање на овој проблем.

САД и Германија: Најпосакувани дестинации за работа

Според студијата, САД се најатрактивната земја за работа, со 33% од испитаниците кои ја избрале како најпосакувана дестинација. Германија е на второ место со 22%, а Канада и Велика Британија делат трето место со 21%.

„Ова е шанса што Европа мора да ја искористи,“ истакнува Фарин, предупредувајќи дека атрактивноста на земјите може да се намали ако не се преземат соодветни мерки.

Лидерство и амбиции: „Глобалниот Југ“ е во подем

Уште еден значаен наод од студијата е поголемата амбиција за лидерски позиции кај испитаниците од „Глобалниот Југ“. Во Индија, 76% од испитаниците изразиле желба за лидерство или претприемништво, додека во Бразил тој процент изнесува 66%. Наспроти тоа, Германија и Франција забележаа само 36% и 37%.

Решенија за Европа

Фарин предлага намалување на даноците за пензионерите кои подолго остануваат на работа, како и промовирање на претприемништвото преку медиумите. Таа апелира до европските лидери да работат заедно и да преземат конкретни чекори за подобрување на состојбата.

„Глобалниот Југ“ покажа дека е подготвен за новите предизвици, а Европа мора итно да реагира ако сака да остане конкурентна на глобалната сцена.

е-Трн да боцка во твојот инбокс

Последни колумни