Откачената сф-акција-комедија „Everything Everywhere All at Once“ доби најмногу (11) номинации, додека воената драма „All Quiet on the Western Front“ и островската драмедија „The Banshees of Inisherin“ по девет номинации за наградите „Оскар“, кои годинава на 12 март ќе се одржуваат по 95-ти пат во театарот „Долби“ во Лос Анџелес.
Преку стриминг во живо, денеска беа соопштени сите номинирани од американската Академија за филмски уметности и науки, а во трката за најдобар филм влезе и новото остварување за „кралот“ на рокенролот, „Elvis“, кој доби осум номинации. Биографската драма е номинирана и за најдобар актер, монтажа, кинематографија, костими и звук.
Тука се и последниот филм на Стивен Спилберт, „The Fabelmans“ со седум номинации меѓу кои за режија и оригинално сценарио, потоа „Top Gun: Maverick“ со Том Круз кој ќе брка „Оскар“ преку шест номинации, исто колку и „Tár“ на Тод Филд, каде Кејт Бланшет е меѓу фаворитите во категоријата за најдобра женска улога.
Случајно или не, авантурата на Џејмс Камерон „Avatar: The Way of Water“ доби пет номинации, најмногу во техничките категории.
Сатирата на Роберт Остлунд „Triangle of Sadness“ исто така е номинаран за најдобар филм, но има можност да земе „Оскар“ и во категоријата за најдобра режија и оригинално сценарио.
Во „топ 10“ трката е и историската драма „Women Talking“ на Сара Поли, каде своја улога има Руни Мара.
Целата листа со номинации може да ја погледнете ТУКА.
