Од Министерството за финансии велат дека сите предмети кои биле доставувани на потпис до министерот, биле испраќани на разгледување и до дополнителната заменик-министерка, вклучително и документите кои се однесуваат на постапките за вработување и унапредување како во нивниот ресор, така и кај другите буџетски корисници
Министерството за финансии негира дека имало незаконски донесени одлуки во постапките за вработување, унапредување и издавање известувања за обезбедени финансиски средства за реализација на нови вработувања кај буџетските корисници.
Реакцијата на Министерството за финансии доаѓа откако денеска дополнителната заменик-министерка за финансии Елена Петрова рече дека од формирањето на техничката влада до денот на распишувањето на изборите имало 36 вработувања на определено време, две вработувања на неопределено време и три унапредувања во Министерството за финансии. Петрова рече и дека биле дадени согласности за целиот јавен сектор за 1 200 вработувања на неопределено време, 448 на определено, ангажирани биле 1 227 лица со договор на дело, а 99 лица се унапредени.
Од Министерството за финансии (МФ), во соопштение испратено попладнево, велат дека од почнување на мандатот на преодната влада сите предмети кои биле доставувани на потпис до министерот, биле испраќани на разгледување и до дополнителната заменик-министерка, вклучително и документите кои се однесуваат на постапките за вработување и унапредување во МФ и издавањето известувања за обезбедени средства за нови вработувања кај буџетските корисници.
„Согласно со Законот за влада чл. 46 е дефинирано дека дополнителниот заменик на министерот заедно со министерот рамноправно ги разгледува и ги потпишува сите акти и документи кои ги донесува министерот, а се однесуваат само на правните, финансиските и кадровските прашања поврзани со организација на изборите. Исто така, согласно членот 46 дополнителниот заменик-министер е должен веднаш, а најдоцна во рок од еден ден да го одобри или одбие актот во смисла на овој закон, за што дополнителниот заменик-министер не одлучуваше по истите“,
се вели во соопштението од Минситерството за финансии.
Од Финансии велат дека поради несогласувањето согласно членот 48 од Законот за Влада, оттаму се обратиле до ДИК, како единствена надлежна институција да одлучува во врска со тоа дали одредено правно, финансиско и кадровско прашање се однесува на организација на изборите.
„По донесената одлука на ДИК, со која се потврди дека не станува збор за прашања поврзани со организација на изборите, беа покренати судски постапки од страна на дополнителниот заменик-министер за финансии пред надлежни судови, каде одлуката на ДИК беше потврдена од страна на Управниот суд, но по жалба пред Виш управен суд истиот ја поништи и ја врати на повторно одлучување“,
додаваат од Финансии.
Од Министерството велат дека од тоа произлегува дека не станува збор за незаконски одлуки на Министерството за финансии, туку се поништува одлуката на ДИК со која се одлучува дека ваквите акти не треба да бидат предмет на врзан потпис и се враќа на повторно одлучување во ДИК.
Дополнителната заменик-министерка за финансии Елена Петрова денеска рече дека вишиот управен суд донел две пресуди во нејзина корист со кои ги поништил како незаконити одлуките на ДИК кои се донесени врз основа на барања на Министерството за финансии.
„Со поништуваето на одлуките на ДИК сите акти поврзани со вработување и унапредување во Министерството кои не се потпишани со врзан потпис на министерот и дополнителниот заменик-министер не произведуваат правно дејство“,
рече Петрова.