Тим на научници од Универзитетот во Амстердам претстави наоди од рана фаза на успешно отстранување на ХИВ вирус од заразени ќелии, користејќи техника на генетички инженеринг ЦРИСПР.
Со таа техника, се сечат „лошите“ делови од ДНК на ниво на молекули. Научниците тежнеат кон целосно чистење на телото од ХИВ, иако нагласуваат дека наодот е само „доказ на концептот“ и уште долго време нема да стане лек, пренесува „Би-Би-Си њуз“.
„Ќе треба уште многу работа за резултатите од овие тестови да се покажат на цело тело за идни терапии“, рече Џејмс Диксон, вонреден професор за технологија на матични ќелии и генетски терапии на Универзитетот во Нотингем.
Креаторите на технологијата ЦРИСПР во 2020 година ја добија Нобеловата награда за хемија. Од нобеловата фондација е истакнато дека таа „има револуционерно влијание врз науката за животот, придонесува за нови терапии за рак, а можеби ќе се оствари и сонот за лекување на наследни болести“.