Свет

Пронајдени се тајни документи во куќата на поранешниот потпретседател на САД, Пенс

Адвокатот на поранешниот американски потпретседател Мајк Пенс минатата недела открил десетина доверливи документи во домот на Пенс во Индијана.

Адвокатот ги предал тие доверливи документи на ФБИ, а ФБИ и Одделението за национална безбедност на Министерството за правда покренаа преглед на документите и истрага за да се утврди како документите завршиле во домот на Пенс.

Пенс претходно во неколку наврати ги негираше наводите дека поседува доверливи документи. Сè уште не е јасно на што се однесуваат овие документи и кое е нивното ниво на чувствителност. Пенс наводно побарал од својот адвокат да ја претресе неговата куќа како мерка на претпазливост, па минатата недела адвокатот почнал да прегледува четири кутии складирани внатре и пронашол мал број доверливи документи.

Адвокатот на Пенс веднаш го известил Националниот архив, а Архивот потоа го известил Министерството за правда. Адвокатот на Пенс потврди дека таа вечер ФБИ веднаш побарало повлекување на доверливите документи, а Пенс не се спротивставил. Агентите од теренската канцеларија на ФБИ во Индијанаполис ги подигнале документите од домот на Пенс.

Вчера, правниот тим на Пенс ги вратил кутиите назад во Вашингтон и ги предал во Националниот архив за да може остатокот од материјалот да биде прегледан за усогласеност со Законот за претседателски документи. Претставникот на Пенс, Грег Џејкоб, испрати писмо до Архивот во кое тврди дека „мал број доверливи документи“ ненамерно биле во кутии и пренесени во домот на поранешниот потпретседател.

„Потпретседателот Пенс не беше свесен за постоењето на чувствителни или доверливи документи во неговата лична резиденција. „Потпретседателот Пенс ја разбира големата важност за заштита на чувствителни и доверливи информации и е подготвен целосно да соработува со Националниот архив и да одговори на прашањата“, напишал Џејкоб.

Неименувани извори изјавиле за Си-Ен-Ен дека доверливиот материјал бил складиран во кутии кои прво отишле во привремениот дом на Пенс во Вирџинија пред да бидат преместени во Индијана. По откривањето на доверливите документи, кутиите во кои се наоѓале биле ставени во сеф лоциран во куќата.

НБА

Леброн: Јокиќ е еден од најдобрите на сите времиња

Првата ѕвезда на Лос Анџелес лејкерс, Леброн Џејмс искажа комплименти за центарот на Деневер, Никола Јокиќ.

Лејкерси ќе се сретнат со Нагетс во 1. коло од плејофот, а дуелот Џејмс – Јокиќ предизвикува големо внимание кај светската кошаркарска јавност.

- Еден од најдобрите досега. Едноставно е таков. Јокиќ може се. Што е најважно, тој го менува начинот на кој неговите соиграчи размислуваат за сопствената игра. Кога некој може да ги инспирира другите да играат на ниво на кое не ни знаеле дека можат, тоа е доказ дека зборуваме за навистина одличен играч, рече Џејмс.

Првата средба во плејоф пресметките меѓу Лос Анџелес лејкерс и Денвер нагетс е закажана за утре. /МИА

Свет

Претставничкиот дом на САД треба да гласа за големиот пакет помош за Украина, Израел и Тајван

По неколкумесечно одложување, Претставничкиот дом на американскиот Конгрес денеска треба да гласа за големиот пакет помош за Украина, Израел и Тајван, вреден 95 милијарди долари, како и за евентуалната забрана на ТикТок во САД.

Предлог-законите се резултат на повеќемесечни тешки преговори меѓу демократите и републиканците, како и притисокот од сојузниците на САД и постојаните молби за помош од украинскиот претседател Володимир Зеленски.

Законите, сепак, сè уште имаат гласни противници во Конгресот, а надежите за усвојување зависат од кревката двопартиска коалиција која се обидува да ги надмине големите процедурални и законодавни пречки, пренесува Би-Би-Си.

Спикерот на Претставничкиот дом Мајк Џонсон изјави дека е решен да ги поднесе законите на гласање, и покрај фактот што радикалните републиканци може да побараат негово разрешување.

Предлогот предвидува 60,8 милијарди долари помош за Украина, 26,4 милијарди долари за Израел и 8,1 милијарди долари за индо-пацифичкиот регион, вклучувајќи го и Тајван.

Претставничкиот дом ќе гласа за секој предлог-закон поединечно, што значи дека некои може да поминат, а некои не.

Претседателот Џо Бајден и демократските пратеници во Конгресот со месеци се залагаат за нов голем пакет оружје за Украина, но републиканците под влијание на нивниот претседателски кандидат Доналд Трамп, ја условуваа помошта.

Со усвојување на законите, исто така, ќе му се овозможи на Бајден да конфискува и продава руски имот, а средствата да ги намени за помош на Украина, потег што беше прифатен и од другите земји од Г7.

Претставничкиот дом ќе ја разгледа и предложената законска одредба со која треба да се принуди ТикТок да се откаже од кинеската матична компанија ByteDance или ќе се соочи со забрана во САД, каде што има околу 170 милиони корисници.

Белата куќа соопшти дека „силно го поддржува“ вкупниот пакет помош и оти Бајден ќе ги потпише законите веднаш штом бидат усвоени од двата дома на Конгресот.

Тоа би можело да се случи за неколку дена, бидејќи лидерот на мнозинството во Сенатот, Чак Шумер, вети дека Сенатот со мнозинство од демократите брзо ќе преземе мерки штом бидат усвоени од Претставничкиот дом.

Сепак, политичките аналитичари во САД оценуваат дека усвојувањето на законите во Претставничкиот дом, би можело да го чини спикерот Мајк Џонсон губење на спикерското место. Неколку екстремно десничарски републикански пратеници предупредија дека може да го соборат Џонсон поради поддршката на нацрт-законите. /МИА

Македонија

Затруен од наркотици пронајден во бессознание во двор во Кавадарци

Кавадарчанец затруен од наркотици бил пронајден во бессознание во двор во Кавадарци, информираа денеска од СВР Велес.  

- Вчера во 12.00 часот во ОВР Kавадарци, од Итна медицинска помош било пријавено дека во дворот на М.К.(42) од овој град, во бессознание бил пронајден кавадарчанецот Б.О.(40), кој бил затруен од наркотични средства. Подоцна, со судска наредба, полициски службеници извршиле претрес во домот на М.К., при што била пронајдена и одземена таблета екстази. М.К. бил лишен од слобода, појаснија од СВР Велес.

Оттаму додадоа дека по документирање на настанот, против него ќе биде поднесена соодветна пријава.

притисни ентер