Тоа е колку да се одржи една комуникација и да не се создаде јаз што потоа потешко ќе може да се исполни. Очигледно дека е потребно формирање на политичка влада, за да може да се најде решение, вели шефот на дипломатијата за контактите со бугарската страна
Вестите од Бугарија не се охрабрувачки, продолжуваме со комуникација на ниво на МНР, но очигледно е потребно формирање на политичка влада за надминување на разликите и деблокада на евроитеграциите, изјави денеска министерот за надворешни работи, Бујар Османи.
„За жал, не се охрабрувачки вестите што доаѓаат од Бугарирја во делот на формирање на институциите, бидејќи тоа се покажа како важен фактор во изнаоѓање решение за надминување на разликите што се причина за оваа непринципиелна блокада на нашата европска перспектива. Ние бевме во очекување дека во овој втор обид ќе има инститиции, за да можеме во тој политички дел да комуницираме и да изнаоѓаме решение. Меѓутоа, независно од тоа, комуникацијата помеѓу двете министерства продолжи и во изминатиот период, имаше директна комуникација на експерти од двете министерства кои разговараа по однос на прашањата што беа отворени на последниот состанок во Софија и презентирани како можност за утврдување на патоказ за надминување на разликите. Се разбира, тоа е колку да се одржи една комуникација на ниво на министерства, за да не се создаде јаз што потоа потешко ќе може да се исполни. Но очигледно дека е потребно формирање на политичка влада, политички институции, за да може да се најде решение“,
изјави Османи.
Според него, македонската страна е подготвена да продолжи со разговорот. Продолжуваме, вели, со реформите во делот на европската интеграција и сме во очекување на предвидливост во Бугарија за да можат да продолжат политичките разговори.
Османи го посочи претстојниот самитот на ЕУ, на 6 октомври, во рамки на словенечкото претседателство, како една исклучителна можност да се круниса успехот и да се даде сериозна порака кон Западен Балкан дека овој пат персективата се враќа на својот колосек. Меѓутоа, додава, сепак, сме во очекување на тоа што се случува во Бугарија.
„Јас цело време бев на ставот дека политичка влада не е неопходна за да се донесе одлука за започнување на преговори, бидејќи политичката одлука за истата е веќе донеснеа. Донесена е во март 2020 година со согласност и на Бугарија. Првата меѓувладина конференција требаше да биде само техничко исполнување на една политичка одлука и оттука се надевав дека може и техничка влада да ја донесе таа одлука. Меѓутоа очигледно тоа се покажа како невозможно. Меѓутоа, ние продолжуваме да комуницираме како што комунициравме претходните денови на ниво на експерти со МНР и со техничката влада, убедувајќи дека регионот и европската перспектива на регионот не смееат да бидат во заложништво на внатрешните политички динамики на која било земја членка“,
вели Османи.
Тој вели дека и во услови кога европската перспектива на регионот не е во своите најблескави денови, земјава продолжува да ги испонува критериумите за членство.
„Со вчерашниот ден, почнувајќи од септември минатата година, односно со почетокот на овој мандат или помалку од една година, С Македонија испорача точно 100 придружувања кон заедничката надворешна и безбедна политика на ЕУ, вклучувајќи тука и рестрикции и санкции, со што вкупниот степен на усогласување со ЕУ првпат надминува 95 проценти, со тенденција за стопроцентно усогласување кон европската надворешна и безбедносна политика… Во време кога и самата ЕУ не успева да обезбеди консензус за продолжување на нашите европски интеграции, ние јасно покажуваме дека сме цврст и принципилен партнер и дека од аспект на нашата европска ориентација немаме дилема дека сме дел од Европа и дека припаѓаме во Унијата“,
вели шефот на дипломатијата.