(ВИДЕО) Се запали мотор од авион на аеродром во Денвер, патниците евакуирани преку едното крило

Од авиокомпанијата потврдиле дека сите 172 патници и шестте членови на екипажот безбедно го напуштиле авионот

Десетици патници биле принудени да се евакуираат преку крило на авион на „Американ ерлајнс“ на меѓународниот аеродром во Денвер откако еден од неговите мотори се запалил, соопшти Федералната управа за авијација (ФАА).

Авиокомпанијата потврди дека сите 172 патници и шестте членови на екипажот безбедно го напуштиле авионот. Како што пишуваат светските медиуми нема извештаи за лица со сериозни повреди, но надлежните потврдиле оти 12 патници со полесни повреди биле пренесени во локална болница за дополнителни прегледи.

Авионот слетал во Денвер откако екипажот се пожалил на вибрации на моторот, соопшти ФАА.

American Airlines flight 4012 caught fire after an engine failed…. Plane was diverted to Denver.

My mom was on this flight. THANK YOU GOD that they are alive. pic.twitter.com/4wBsFlj4TU

— Alexandria Cullen (@AlexandriaCTV) March 14, 2025

На социјалните мрежи се шири снимка од патници кои стојат на крилото на авионот и чекаат да бидат евакуирани додека густ чад излегува од моторот.

Од компанијата велат дека авионот слетал безбедно на аеродромот, но потоа настанал проблем поврзан со моторот.

Портпаролот на меѓународниот аеродром во Денвер, пишува Си-ен-ен, потврди дека пожарот е изгаснат и дека летовите продолжиле да се одвиваат без прекин.

Овој пожар на моторот на авионот доаѓа неколку недели откако авион на „Делта ерлајнс“ се урна при слетување на пистата на меѓународниот аеродром „Пирсон“ во Торонто, Канада, а поради мразот и снегот авион се превртел на покривот.