ekran платформа за слободоумни
Денес со почеток во 18:00 часот во Лабораториум во Скопје, ќе се одржи промоцијата на „Мали диви детективи“ – интерактивна сликовница од Сања Арсова и илустраторката Маја Андоновска.
Промотор: Ана Голејшка Џикова
„Мали диви детективи“ е книга наменета за млади читатели кои се во потрага по авантура и мистерии во својот литературен свет. Оваа приказна е напишана со цел не само да забавува, туку и да ги едуцира младите умови, преку истражување интересни случаи и решавање на големи мистерии. Главните ликови во оваа приказна се Миа и Томи, двајца контрастни пријатели и нивното верно куче другар Ралф, предан и верен, важен дел од детективската екипа. Миа е брза, возбудлива и понекогаш лута по природа, но со нејзината живост и решителност таа ги води читателите низ забавни авантури. Наспроти нејзината брзина и енергија, го имаме Томи, чија смиреност и мудрост често се потребни за смирување на ситуацијата и наоѓање на решение. Нивните различни карактери им овозможуваат на младите читатели да се идентификуваат со нив и да учат важни животни способности како тимска работа и решавање на проблеми.
Она што ја прави оваа книга особено интересна е тоа што читателите имаат активна улога во решавањето на мистериите. Тие треба да бидат проникливи, да се вклучат и да размислуваат како би им помогнале на Миа и Томи да го решат случајот за украдениот папагал. Ова ги поттикнува читателите да ја развиваат својата креативност и логичко размислување. Детективската литература има непроценливо значење за развојот на децата. Таа не само што ги забавува, туку и ги поттикнува да размислуваат, анализираат и решаваат проблеми. Преку приказните за детективите, децата учат да бидат аналитични, да применуваат логика и да размислуваат за последиците на одлуките. Ова ги поттикнува на креативно и критичко размислување, што им помага во секојдневниот живот и во решавањето на нивните предизвици.
Авторката Сања Арсова е човек што никогаш не го напушти детскиот свет. А и не ни сака! Една од ретките што ужива во својата животна улога како професор по англиски јазик. Секојдневната дружба со нејзините ученици и е бесконечна инспирација и влез до универзумот на детската фантазија. Долгогодишен борец за поубаво детство и иднина на најмалите. Вегетаријанец пред ручек (освен ако бурекот не е со месо) и љубител на сите живи суштества со не повеќе од 4 нозе. Обожава лубеници, мирис на кафе и квалитетно поминато време со најмилите.
Маја Андоновска е илустратор, концепт артист и се’ друго за кое треба цртање. Секогаш расположена да научи некој интересен факт, да прочита некоја книга, да се насмее со добра серија и сето тоа да се сподели и дискутира со пријателите. Пробува да биде поблиску со природата бидејќи верува дека треба да се одржува баланс помеѓу умот и телото па затоа не одбива прошетки низ зеленило. Љубител на сите живини, особено нашите најдобри другарчиња – кучињата. Склоп на спонтани мисли, креативни идеи и бесконечни филозофии.
