Од Царинската управа за „360 степени“ потврдуваат дека во комбето имало телефони и телефонска галантерија и велат дека при проверката е утврдено дека количината на стоката што е затекната во комбето не соодветствувала со таа што била декларирана на Царина
Два дена откако стока што поминала на Царинската испостава „Аеродром Скопје“ и била натоварена во комбе, кое беше пресретнато на патот Петровец – Скопје во заедничка акција на полициските и на царинските служби, по што беше пломбирано и земено за понатамошна проверка, од Царинската управа открија каква стока се превезувала во него. Во изјава за „360 степени“ директорот на Царинската управа, Стефан Богоев потврди дека станува збор за мобилни телефони и телефонска галантерија.
За овој случај, од ВМРО-ДПМНЕ денеска преку соопштение велат дека станува збор за скандал од стотици илјади евра и велат дека во комбето се пренесувале 1 200 килограми скапи телефони.
Од партијата велат дека информацијата оти полицијата спречила шверц на телефони требало да ја соопшти Царинската управа, а не, како што велат, јавноста за тоа да дознае од медиумите.
„Комбе полно со скапи телефони, т.е. со пакети тешки 1 200 килограми е фатено на автопатот Петровец – Скопје откако веќе ја поминало Царината која евидентирала дека истото превезува друга стока, а не телефони. Да не била акцијата на полицијата, 1 200 килограми скапи телефони ќе завршеле на црниот пазар“,
велат од ВМРО-ДПМНЕ.
Во соопштението од партијата направена е и, како што велат, едноставна математика, со која е пресметано дека со продажбата на телефоните би се дошло до сума од половина до еден милион евра.
„Доколку се направи едноставна математика и се земе дека во комбето имало само 1 200 телефони, кои би се продавале по цена од 500 до 1 000 евра, се доаѓа до сума од над половина милион до еден милион евра. Тоа е сериозен криминал, кој очигледно е правен во содејство со власта“,
додаваат од ВМРО-ДПМНЕ.
Оттаму прашуваат дали Царинската управа го овозможила ваквиот криминал и дали зад сето ова стои Стефан Богоев, потпретседател на СДС.
Од Царинската управа за „360 степени“ потврдуваат дека во комбето имало телефони и телефонска галантерија и велат дека при проверката е утврдено дека количината на стоката што е затекната во комбето не соодветствувала со таа што била декларирана на Царина.
„Пратката стигнала на Царинската испостава, ја поминала контролата и додека возилото било во движење од Министерството за внатрешни работи беше побарана наша асистенција при контрола на комбето поради индиции дека во него се превезуваат наркотични средства. Во асистенцијата беше вклучено и царинско куче, при што не беа најдени никакви наркотични средства. Но, цариниците утврдиле дека количината на стоката која била во комбето не соодветствувала со таа во декларацијата. Затоа комбето е пломибирано и задржано на понатамошно постапување“,
вели директорот на Царинска управа, Стефан Богоев.
Според Богоев, не станува збор за шверц на телефони бидејќи, како што вели, тие биле пријавени, но соодносот и количините не се исти со тоа што е декларирано.
Директорот Богоев вели дека целта на увозникот била да сокрие дел од количината на стоката за да плати помали давачки, а за тоа, како што вели, ќе биде поднесена и кривична пријава.
Богоев вели и дека дополнително, Секторот за професионална одговорност при Царинската управа започнал постапка со цел да се утврди евентуална одговорност или одредени пропусти на царинските службеници кои ја царинеле стоката.
„Политичките партии да се воздржат од ширење на непроверени податоци и информации, кои единствено можат да наштетат на истрагата. Кога зборуваме за нула толеранција против криминалот и корупцијата, не зборуваме само за декларативни заложби, туку зборуваме за конкретни и веќе преземени чекори кои даваат видливи резултати“,
вели Богоев.
Од Царинската управа велат дека само минатата година имале 30 отсто зголемен број на заплени и 60 отсто зголемен број на поднесени кривични пријави.