Договорот со Бугарија и условувањето од Софија за евроинтегративниот пат на Македонија – меѓу главните теми во вечерашната Топ Тема. Претставниците од СДСМ и ВМРО-ДПМНЕ ги изнесоа своите ставови околу спорот на релација Скопје-Софија.
Според Андреј Петров од СДСМ, Бугарија не е таа што има проблем, туку Македонија. За него, најнедостоинствената работа е фактот што 150 илјади наши граѓани извадиле бугарски пасош. Петров верува дека доколку се смени уставот, земјата ќе почне да се движи по вистинската патека, мора да се внимава да не се понижува македонскиот идентитет.
„Никој не го ставил на коцка македонскиот идентитет и јазик што се потврди и со договорот на Фронтекс кој е потпишан чисто на македонски јазик. Многумина ме прашуваат што е различно од претходно. Различно е што и Бугарија и Грција го потпишаа и парафираа тој договор на јазикот кој е наш јазик и од кој ние никогаш не сме отстапиле“, изјави Петров.
Клековски тврди – ВМРО-ДПМНЕ нема намера да ја држи земјата во изолација и ќор-сокак, а попустливоста е грешка на македонската страна.
„Бугарите се инспирирани од нашето попуштање на Грција. Затоа што ние на Грците им дозволивме ограничување територијално и временски на концептот на етнички Македонец. Бугарите исто го бараат сега тоа, да територијално и временски се ограничи дека Македонци има само во оваа територија, и дека тој концепт постои од 44-та година“, изјави Клековски.
„Попустливоста на политиката не се мери по тоа како ја перцепираме јас или г-дин Клековски, или партиите. Се мери врз база на тоа каков е исходот од таа политика, и дали таа политика ќе доведе до подобро утре за граѓаните или до полошо утре за граѓаните. Моето мислење е дека ваквата политика која е проевропска, прозападна, не подразбира да се наведне глава зашто нема потреба да се наведне глава, никој од нас тоа не го бара“, изјави Петров.