Најчесто регистрирано акутно заразно заболување биле овчите сипаници со вкупно 825 пријавени лица, а 239 лица биле заболени од голема кашлица. Минатиот месец имало пријавени и два случаи на заразни заушки и тоа кај лице над 60 години кое било невакцинирано и кај дете во возрасна група од 5 до 9 години кое било вакцинирано
Во текот на минатиот месец биле пријавени вкупно 1 431 заболени од акутни заразни заболувања, се наведува во извештајот на Институтот за јавно здравје (ИЈЗ). Бројот на пријавени случаи во март, според ИЈЗ, претставува зголемување за 27 проценти во однос на февруари годинава. Податоците на ИЈЗ покажуваат дека најчесто акутно заболување биле овчите сипаници, а имало регистрирани случаи и на заушки и шуга.
Според извештајот на ИЈЗ, пријавени биле два случаи на заразни заушки и тоа кај лице над 60 години кое било невакцинирано и кај дете во возрасна група од 5 до 9 години кое било вакцинирано.
Во текот на март, од ИЈЗ наведуваат дека биле регистрирани и случаи на шуга кај странски државјанин од Турција и инфективна мононуклеоза кај странски државјанин од Косово.
„Во текот на март, најчесто регистрирано акутно заразно заболување се овчите сипаници со вкупно 825 пријавени лица. Тие во вкупниот број заболени во месецот учествуваат со 57,7 отсто, а во групата на десетте најчести заразни заболувања за овој месец учествуваат со 58,5 проценти. Во однос на претходниот месец, се регистрира зголемување на бројот на пријавени од овчи сипаници за 24,8 отсто, додека во однос на месец март 2023, се регистрира намалување за 9,4 проценти“,
се додава во извештајот.
Освен овчите сипаници, во март имало пријавени 239 заболени од голема кашлица. Во однос на февруари, според извештаите на ИЈЗ, регистрирано е зголемување на бројот на заболени лица од голема кашлица за 99,2 отсто, додека истиот месец минатата година, ниту во претходните десет години, не биле регистрирани заболени.
Во групата на сексуално и крвно преносливи инфекции – без ХИВ/СИДА, регистрирани се 19 заболени лица. Пријавени се девет случаи на сифилис, шест случаи на вирусен хепатитис Б, три случаи на вирусен хепатит Ц и еден случај на инфекција со хламидија.
Пријавени се четири случаи потврдени на ХИВ и два на СИДА во текот на март. Од машки пол се пет лица и еден од женски пол, кои припаѓаат на возрасната група од 20 до 44 години.
„Регистрирани се и шест случаи на вирусен хепатитис Б и три случаи на пневмококна инфекција со дијагноза на пневмококен менингитис, кои според возраста не подлежат на имунизација согласно Календарот за задолжителна имунизација во РСМ и не се вакцинирани против овие болести. Дијагнозата е потврдена лабораториски“,
пишува во извештајот на ИЈЗ.