Главниот оперативен директор и член на Управниот одбор на Комерцијална банка АД Скопје, Илија Илоски го зголеми својот удел и се стекна со 100 акции од Банката.
„Комерцијална банка АД Скопје известува дека г-дин Илија Илоски, Главен оперативен директор и Член на Управниот одбор, се стекна со 100 обични акции издадени од Комерцијална банка АД Скопје”, се вели во соопштението објавено на Македонска берза.
Согласно пресметките на Банкарство, просечната вредност по акција на Комерцијална банка на ден 09.02.2024 година кога е објавена информацијата, а согласно податоците од Македонска берза изнесувала околу 16.000,00 денари, што значи дека блок трансакцијата за 100 обични акции изнесувала околу 1.600.000,00 денари или приближно 26.000 евра.
Дека овој период е погоден за инвестирање во Комерцијална банка АД Скопје покажува податокот дека пред неколку денови идентичен број на акции купи и главниот директор за корпоративно банкарство и член на УО, Билјана Максимовска – Поповиќ, а неколку месеци претходно и главниот директор за продажба и развој и член на УО, Д-р Никола Џамбазовски купи 120 обични акции од Комерцијална банка.
Со купувањето на акциите, членови на менаџментот на Комерцијална банка АД Скопје не само што покажуваат дека веруваат во стабилноста и успешноста на банката со која раководат, туку и сигнализираат дека е погодно време е за вложување во неа.
Ако на тоа се додаде дека Комерцијална банка АД Скопје ја заврши годината со одлична заработка од неверојатни 58,2 милиони евра и го доби епитетот најпрофитабилна банка на македонскиот пазар за 2023 година, а нејзината акција е бестселер на нашиот пазар на капитал, оправдано големи се очекувањата на акционерите кои чекаат да бидат наградени за одличното работење на банката во изминатиот период. ()