Холандскиот музичар Јост Клајн е дисквалификуван од Изборот за песна на Евровизија во саботата, откако шведската полиција го истражуваше наводот за несоодветно однесување кон член на продуцентската екипа, соопшти Европската радиодифузна унија (EBU) која го организира натпреварот.
„Холандскиот уметник Јост Клајн нема да се натпреварува во големото финале на овогодинешниот Избор за песна на Евровизија“, се вели во соопштението на EBU.
„Шведската полиција истражуваше поплака од член на продукциската екипа по неговиот настап во полуфиналето во четвртокот навечер. Не би било соодветно тој да продолжи да се натпреварува додека трае правниот процес“, се додава.
Од EBU велат и дека има политика на нулта толеранција за несоодветно однесување „и ние сме посветени на обезбедување безбедна работна средина за целиот натпреварувачки персонал“. „Во тој контекст, однесувањето на Јост Клајн се смета за прекршување на правилата за натпреварување“.
Затоа во финалето ќе учествуваат 25 земји.
Шведските и холандските медиуми објавија дека Клајн, кој требаше да го изведе „Europopa“ во финалето, е под истрага по инцидентот во кој учествувал женски член на тимот на телевизиската продукција.
„Мажот е осомничен за закани и заплашување. Бил испрашуван во полиција, но не бил приведен“, објави портпаролката на шведската полиција.
„Истрагата е завршена, бидејќи полицијата ги презеде сите истражни дејствија и ги испраша осомничениот, обвинителот и сведоците. Тоа го следи вообичаениот правен процес“, додаде таа.
Холандската телевизија одлуката за дисквалификација ја оцени како „несразмерна“.
Претходните медиумски извештаи, кои се појавија откако Клајн не настапи на петочната проба, сугерираа дека има конфликт меѓу Клајн и израелската делегација поради различните ставови за војната меѓу Израел и Хамас.
Неговото исклучување, сепак, нема никаква врска со неговиот однос кон другите делегации, посочија од EBU.
