Европскиот суд за човекови права соопшти дека може да суди по тужбите поднесени против Русија од страна на Холандија и Украина за кршење на човековите права во источна Украина во 2014 година, вклучувајќи го и соборувањето на малезискиот патнички авион MH17.
Двете земји ваквите тужби ги поднесоа пред руската инвазија на Украина, а одлуката на највисокиот европски суд е значителен напредок во напорите на Холандија и Украина да ја повикаат Русија на одговорност за нејзините постапки во Украина и може да отвори врата за компензацијa.
Судот соопшти дека доказите презентирани на сослушувањето минатата година покажале дека од 11 мај 2014 година, областите контролирани од сепаратистичките бунтовници биле „под јурисдикција на Руската Федерација” и дека Москва имала „значително влијание врз воената стратегија на сепаратистите” вклучувајќи и испорака на оружје, артилериски напади на барање на бунтовниците и обезбедување политичка и економска поддршка.