Димитријевиќ втор стрелец, Уникс со победа ја отвори полуфиналната серија во ВТБ лигата

Уникс Казањ на Ненад Димитријевиќ имаше посакуван старт на полуфиналната серија со Локомотив Кубањ во ВТБ лигата.

Избраниците на Велимир Перасовиќ го одбранија домашниот терен и славеа со 78:75. Домашните играчи имаа се под контрола во првиот дел кој го заврши со плус 13 (38:25), во тој стил продолжија и во третиот период за да во завршните десет минути гостите притиснат и сериозно се доближат, но Уникс го имаше последниот збор и дојде до триумфот.

Македонскиот репрезентативец Димитријевиќ беше втор стрелец кај победникот со 16 поени зад Грин со уфрлени 19 кошеви. Нено собра и 2 скока со 6 асистенции и 3 украдени топки.

Вајт пак со 15 поени ја предводеше листата на стрелци кај поразените.

Вториот меч во серијата е закажан за 8 мај.