Поддршка за 12 стари занаети во Гостивар

Општина Гостивар ќе издвои финансиски средства за поддршка на стари занаети. На денешната седница, Советот донесе одлука за доделување по 10.000 денари на 12 стари занаетчии од гостиварското подрачје.

„Ова е една симболичен износ за старите ретки занаети за кои заклучивме дека е потребно да се поттикнат, мотивираат да ја продолжат традицијата и да ја одржат дејноста“, рече претседателот на Советот Валбон Лимани.

Одлуката беше изгласана, но сепак, како што беше образложено, за да се запазат законските одредби, парите ќе бидат исплатени по завршување на изборите.

На денешната седница на општинскиот Совет, беше усвоен и извештајот за работата на службеникот за млади во општината, при што беа презентирани реализираните активности во изминатата година, кои го опфаќаат Советот на млади. Меѓу нив беа напоменети: отворен ден, панел дискусија, студиска посета во Тирана, дебата за предизвиците и иднината на земјата, премиера на документарен филм „Гостивар град на култура и соживот“ и др.

Советот усвои и неколку точки од областа на урбанизмот и финансиите.