Најмалку 50.000 руски војници загинале досега во конфликтот во Украина, покажува последното истражување на британскиот јавен сервис. Москва официјално не соопштува податоци за загинати припадници на армијата, но тоа е бројка на војници чија смрт Британците успеале да ја потврдат, додека напоменуваат дека вистинскиот број на загинати е многу повисок, затоа што во нивната анализа немаат вклучено информации за жртвите во паравоените формации во сепаратистичките републики Доњецк и Луганск.
Истражувањето е спроведено од страна на рускиот сервис на БиБиСи, независната медиумска групација Медиазона и доброволци, кои собирале податоци уште од февруари 2022 година.
Истражителите информации за загинатите барале во официјалните извештаи на руските власти, медиумските написи и објави на социјалните медиуми.
Тие заклучиле дека бројот на загинати руски војници во втората година од војната изнесува 27.300, што е малку повеќе за разлика од првата. Освен тоа, во податоците се забележуваат и периодични отскокнувања кои соодветствуваат со битките и освојувањата на Бахмут и Авдиивка.
Слично како и Русија, и Украина редовно не соопштува податоци за загинати, иако во февруари украинскиот претседател Володимир Зеленски изјави дека од почетокот на руската инвазија загинале 31.000 украински војници. Сепак, и оваа бројка според американските разузнавачи е значително пониска од реалната.