Што се сезонски алергии?
Сезонските алергии се многу непријатна дијагноза. Околу 25% од луѓето имаат симптоми на сезонска алергија секоја година. Тие симптоми вклучуваат кивање, затнат нос, течење и секрет од носот, црвени очи кои чешаат, чешање на кожата и се навистина исцрпувачки бидејќи се секојдневни и го отежнуваат нормалното функционирање.
Што ги предизвикува симптомите на сезонска алергија?
Ако сте осетливи на некој алерген, вашиот имун систем ќе го препознае тој алерген како штетен за вашето тело. За да го елиминира, односно за да се избори со него, почнува да создава протеини познати како имуноглобулински антитела. Овие антитела потоа ги предизвикуваат клетките во назофарингеалната слузница да ослободуваат хистамин и други медијатори кои доведуваат до тоа да имате затнат нос и чешање во носот, секрет во носот и грлото, солзливи очи и други симптоми на алергија.
Кои тестови треба да се направат за да се потврди алергијата?
За потврда на алергијата треба да се направат кожни тестови кои ќе помогнат во одредувањето кој алерген ги предизвикува проблемите како на пример полен, габи (мувли), храна, животински влакна, отрови од разни инсекти, лекови, латекс и др.
Најчесто за откривање на причинителот на алергија се прави т.н. кожен тест или со загребување или со инјектирање во кожата на различни супстанции за кои се сомневаме дека ја предизвикуваат алергијата. Тестот се изведува со апликација на капки од растворот на алергенот на кожата на внатрешната страна на подлактницата. После нанесување на алергенот, местото лесно се гребнува со ланцета низ самиот алерген, со цел алергенот да стигне до површинскиот слој на кожата. После 20 минути се отчитува реакцијата на местото на аплицираниот алерген. Појава на црвенило, папула и јадеж на определеното место е сигурен знак за алергиска реакција на организмот со соодветниот алерген.
Постои и т.н. patch (во вид на лепенки) тестови кои претставуваат дијагностички тестови за одложен тип на контактна алергија. Стандардната серија patch тестови (ПТ) обично вклучува 20-30 хемикалии. Со тоа се покриваат 70-80% од сите контактни алергии. Достапни се и други тест серии, како на пр. серии за кондиционери и козметика, пластика, лепаци, акрилни смоли, хемикалии кои се користат во обликување на косата, дентални продукти, итн. Исто така, можат да се користат и хемикалии кои ги обезбедил пациентот/пациентката.
Во врска со тоа кој тест треба да го направите, најдобро е да се консултирате со вашиот матичен лекар или матичен педијатар доколку се работи за вашето дете.
Кои се најчестите препораки за справување со сезонски алергии?
Иако сезонските алергии знаат да ви го отежнат секојдневието, сепак не треба да се лишите од уживање во активности на отворено во пролет и лето. Постои голем избор на ОТЦ препарати кои можат да ви помогнат во третманот на симптомите и нивно ублажување како антихистаминици во облик на таблети, спрејови за нос и капки за очи. Овие препарати е најдобро да се земаат пред излегување надвор како би се минимизирале или дури и спречиле непријатните симптоми. Имајте во предвид дека некои од овие лекови може да предизвикаат несоница, зголемен крвен притисок, летаргија и затоа треба да бидете внимателни. Можеби ќе треба да пробате неколку различни видови на лекови пред да откриете кој од нив најдобро делува кај вас.
Од голема важност исто така е да го ограничите изложувањето на одредени алергени. Носењето маска кога сте надвор може да помогне кога концентрацијата на полен е висока во воздухот. Намалете го проветрувањето на домот како би избегнале навлегување на свеж воздух а со тоа и полен внатре во домот. Избегнувајте сушење на алиштата надвор на жица бидејќи поленот или мувлата може да се соберат во алиштата. Не излегувајте надвор кога времето е ветровито и суво и избегнувајте градинарски обврски како косење трева со која ќе се разлетаат алергените.
Што е имунотерапија со алергени?
Имунотерапија со алергени е термин со кој се означува примање инјекции со алергени. Тоа вклучува давање на инјекции во некој временски период со кои телото се запознава со одреден алерген со цел да се навикне на истиот и да се избегне прекумерен имун одговор кој потоа ќе ги предизвика симптомите на алергија. Ова може да помогне за да се намалат симптомите на алергиите предизвикани од надворешни агенси како трева, коров, мувла, животни, инсекти и осетливост на грињи. Имунотерапијата со алергени дава долготрајна толеранција, што би значело дека луѓето можат да имаат намалување на симптомите на алергија и да користат помалку лекови откако ќе завршат со комплетниот третман со имунотерапија. Сепак, вашиот матичен лекар или тимот од алерголози треба да одлучи дали и кој би бил добар кандидат за примање на имунотерапија.
