Годинешната церемонија е јубилејна 20-та по ред, а доделувањето на признанието денеска се поклопи и со Светскиот ден на животната средина, за што претседателот им порача дека како инженери имаат клучна улога во изнаоѓањето на одржливи технолошки решенија за климатските промени и за заштитата на животната средина
Дванаесет најуспешни дипломирани инженери од македонските факултети од вечерва се побогати со признанието „Инженерски прстен 2023“.
Признанијата вечерва во претседателскиот кабинет ги врачи шефот на државата Стево Пендаровски, кој традиционално е покровител на оваа манифестација, која е во организација на Инженерската институција на Македонија и на Комората на овластени архитекти и овластени инженери.
„Признанието има за цел да ве мотивира да се стремите кон извонредност. Императив во животот е постојано да се надградувате, да ги унапредувате своите технички знаења и дигитални вештини, да ги ширите вашите видици. Трудете се да размислувате интердисциплинарно бидејќи најголемите научни, технички и технолошки пробиви се случуваат кога ќе излезете од комфорната зона на вашата потесна струка и ќе се соочите со идеите и концептите на различните дисциплини“,
рече Пендаровски.
Годинешната церемонија е јубилејна 20-та по ред, а доделувањето на признанието денеска се поклопи и со Светскиот ден на животната средина, за што претседателот имаше посебна порака за инженерите.
„Инженерите имаат клучна улога во изнаоѓањето на одржливи технолошки решенија за климатските промени и за заштитата на животната околина. Успесите што многу наши млади луѓе ги постигнуваат на меѓународните натпревари и конкурси сведочат дека македонската инженерска заедница не заостанува зад колегите од странство. Затоа, ве охрабрувам да се вклучите во глобалниот натпревар на идеи и решенија што можат да придонесат за поодржлив раст и развој за Северна Македонија, за регионот и за Европа“,
рече Пендаровски.
Добитниците на признанието „Инженерски прстен 2023“ во најголем дел се од факултетите при Универзитетот „Кирил и Методиј“ – Скопје (УКИМ). Во продолжение ја пренесуваме целосната листа на добитници:
- Елена Настеска – Архитектонски факултет, Универзитет „Св. Кирил и Методиј“ – Скопје;
- Димитар Гошев – Градежен факултет, Универзитет „Св. Кирил и Методиј“ – Скопје;
- Моника Шаревска – Машински факултет, Универзитет „Св. Кирил и Методиј“ – Скопје;
- Вероника Стојановска – Технолошко-металуршки факултет, Универзитет „Св. Кирил и Методиј“ – Скопје;
- Бојан Софрониески – Факултет за електротехника и информациски технологии, Универзитет „Св. Кирил и Методиј“ – Скопје;
- Симона Цветковска – Факултет за земјоделски науки и храна, Универзитет „Св. Кирил и Методиј“ – Скопје;
- Милена Трајаноска – Факултет за информатички науки и компјутерско инженерство, Универзитет „Св. Кирил и Методиј“ – Скопје;
- Ники Петрески – Факултет за шумарски науки, пејзажна архитектура и екоинженеринг „Ханс Ем“, Универзитет „Св. Кирил и Методиј“ – Скопје;
- Ева Ристова – Факултет за дизајн и технологии на мебел и ентериер, Универзитет „Св. Кирил и Методиј“ – Скопје;
- Антонио Андоновски – Природно-математички факултет, Универзитет „Св. Кирил и Методиј“ – Скопје;
- Ана Михаиловска – Факултет за природни и технички науки, Универзитет „Гоце Делчев“ – Штип;
- Сара Петковска – Технички факултет Битола, Универзитет „Св. Климент Охридски“ – Битола.