Стрелките на часовникот во 02:00 по полноќ ќе се поместат еден час понапред и времето ќе се смета како 03:00, а овој начин на сметање на времето ќе важи до 27 октомври годинава, кога во 03:00 стрелките ќе се вратат еден час наназад, па затоа времето во 03:00 часот, ќе се смета како 02:00 часот.
Одлуката за воведување на летното сметање на времето е согласно Законот за сметање на времето („Службен весник на Република Македонија“ бр.17/96 и 16/97) и согласно европски директиви, информираше Владата во вторникот. Во Македонија, која беше дел од Југославија, летното сметање на времето се користи од 1983 година, а по осамостојувањето, од 1996 г. е регулирано со Законот за сметање на времето.
Во минатото на големо се дебатираше за потребата за укинување на оваа мерка, а за да се укине целосно, земјите-членки на Европската унија ќе треба да се договорат дали сакаат да имплементираат трајно зимско или летно сметање на времето. Договор барем засега се уште нема ни на повидок, па затоа извесно е дека менувањето на стрелките на часовниците ќе продолжи и во иднина.