Општина Центар започна со инсталирање на паметно јавно осветлување на цела територија на општината. Тоа значи дека граѓаните на Општина Центар добиваат јавно осветлување со нова ЛЕД технологија за автоматско димирање, односно приспособување на светлината следствено временските услови или зачестениот сообраќај на улицата.
На територија на Општина Центар ќе бидат поставени 3.982 улични светилки со нова технологија на ЛЕД-светилки, за паметно мерење и управување со електричната енергија. Светилките ќе се инсталираат во две фази и тоа по урбани заедници. Ќе се демонтираат старите и ќе се монтираат новите светилки. Предвидени се различни типови на светилки, вкупно четири, за различни типови на сообраќајници односно дали истите ќе бидат поставени на главни, споредни и резиденцијални улици, пешачки патеки или на споредни улици.
Процесот за менување на јавното осветлување го имплементира А1 Македонија и во Општина Центар го започна со поставување на тип 1 светилките кои се инсталираат на најфреквентните улици во општината, а започна и инсталирањето на тип 2 светилките кои ќе бидат инсталирани на споредни улици низ целата општина, односно близу основни училишта, градинки, паркови, шеталишта итн. Тип 3 светилките ќе бидат инсталирани на спореди резиденцијални улици, додека Тип 4 на споредните улици и пешачките патеки на територија на општината.
Општина Центар ги информира граѓаните дека новите ЛЕД светилки немаат еколошки штетни материјали, немаат УВ-зрачење, имаат висок и предвидлив животен век, емитуваат светлина само во видливиот опсег, имаат компактна големина, намалена потрошувачка на електрична енергија, висока светлосна ефикасност, одличен индекс за рендерирање на бои, лесни се за рециклирање, помалку привлекуваат ноќни инсекти и се отпорни на вибрации и удари.
Од Општина Центар појаснуваат дека овие светилки не се палат мануелно туку тие почнуваат да светат следејќи го намалувањето на дневната светлина додека нивната јачина на светлост се зголемува како што настапува ноќта.
– Исто така, светлината на овие паметни светилки е во мирување со потивка осветленост кога на улицата нема движење, односно светлината се зголемува кога на улицата ќе помине пешак или автомобил. Светлината која ќе зрачи од овие нови паметни светилки ќе биде ниту многу жолта, ниту многу бела односно ќе биде светлина која ја зголемува видливоста на возачите и пешаците. Тоа значи дека Општина Центар ќе има побезбедни улици за сите граѓани и учесници во сообраќајот, но и побезбедни маала од било какви девијантни појави. Со овие светилки Општина Центар става крај на темните ќошиња – велат од локалната самоуправа.
Воедно, оваа технологија значи дополнителни заштеди за општинските средства и нивна пренамена во други нови проекти за граѓаните. Општина Центар преку реализација на овој проект ќе ја унапреди енергетската ефикасност со тоа што ќе оствари заштеда до 70% на потрошувачката на електрична енергија за јавно осветлување и повеќе од 75% на трошоците за одржување на сè уште постојниот систем.
-Со новото јавно осветлување Општина Центар ја унапредува енергетската ефикасност, остварување на заштеда во однос на потрошувачката на електрична енергија и во однос на одржувањето на уличното осветлување и го подобрува квалитетот на животната средина – нагласуваат од локалната самоуправа.
