Живот

Африканските земји страдаат од секојдневен недостиг на електрична енергија

Недостигот на електрична енергија што погодува 54 африкански земји претставува сериозен хендикеп за економскиот раст на континентот.

Од Зимбабве, земја во која многумина мораат да работат ноќе бидејќи тоа е единственото време кога има струја, до Нигерија каде што често се случуваат дефекти на електричните мрежи, сигурното напојување со електрична енергија станува реткост на африканскиот континент.

Недостигот на електрична енергија што погодува 54 африкански земји претставува сериозен хендикеп за економскиот раст на континентот, предупредуваат енергетските експерти, пренесуваат американски медиуми.

Во последниве години, производството на електрична енергија во Јужна Африка стана толку несоодветно што дури и најразвиената економија на континентот има дневни прекини на струја од осум до 10 часа.

Според податоците на Меѓународната агенција за енергија за 2021 година, 43 отсто од Африканците, околу 600 милиони луѓе, немале пристап до електрична енергија, вклучително и 590 милиони во субсахарска Африка.

Според проценките на Светска банка, потребни се инвестиции од речиси 20 милијарди долари годишно за да се обезбеди уедначена електрификација низ субсахарска Африка.

Од ова, потребно е да се издвојат речиси 10 милијарди долари годишно за носење електрична енергија и одржување на мрежата во Западна и Централна Африка.

Формула

Норис верува во прва Ф1 победа оваа сезона

Возачот на Мекларен, Ландо Норис, изјави денеска дека неговиот настап на последната трка во Кина покажал дека може да ја оствари својата прва Формула 1 победа оваа сезона.

Норис заврши втор на кинеското ГП во Шангај минатата недела зад Макс Ферстапен од Ред Бул, порачувајќи дека и самиот не очекувал таков резултат.

Во последните 23 трки, Ферстапен забележа 21 победа и на другите возачи им е тешко да му парираат.

„Веќе реков, не ми треба поголема самодоверба. Трката во Кина тоа го докажа. На почетокот на годината реков дека мислам оти можеме да се бориме против Ред Бул и ќе можеме да победуваме. Секако тоа нема да биде лесно. Но во едно вистинско време, во добри услови и со работи што малку повеќе ќе му одговараат на нашиот болид – верувам 100 отсто во тимот и во мојата способност да го направам тоа“, изјави Норис за Скај. /МИА

Македонија

Поради чести одрони во Дебарско се препорачува многу внимателно возење

Поради чести одрони и влажни коловози на патните правци, кои се под надлежност на дебарската секција на Јавното претпријатие за одржување на магистрални и регионални патишта, се препорачува многу внимателно возење.

- Поради обилните дождови присутни на патните правци под наша надлежност има чести, но помали одрони од камен и земја. Поради тоа, но и влажните коловози препорачуваме многу внимателно возење, приспособување на брзината на движење според условите на патот и строго почитување на патната сигнализација, изјави за МИА Деар Лиманоски, раководител на секцијата.

Екипи на секцијата се постојано на терен со цел навремено расчистување и безбедно одвивање на сообраќајот.

-Под наша надлежност се патишта во должина од над 120 километри, делниците Дебар - Жировница (патен правец Дебар - Маврово), Дебар - Глобочица (патен правец Дебар - Струга), патот кон граничниот премин „Блато“, кракот Бошков Мост кон селата на Мала Река, како и патот Мелнички Мост - Центар Жупа, посочува тој.

Додава дека снегот, кој врнеше во неделата, не создаде проблеми во одвивањето на сообраќајот, но придонесе за појава на одрони.

Македонија

Чешка донираше инкубатор за бебиња на клиниката „Мајка Тереза“ во Чаир

Чешкиот амбасадор Јарослав Лудва заедно со Министерот за здравство Илир Демири официјално предаде инкубатор од чешката фирма ТСЕ Ческе Будјејовице.

„Оваа опрема од ТСЕ е уште една потврда за пријателските врски помеѓу нашите две земји. Сигурен сум дека овој инкубатор со висока технологија понатаму ќе го унапреди угледот на клиниката во Чаир и ќе спаси многу бебешки животи,“ рече чешкиот амбасадор Јарослав Лудва.

Финансирањето на проектот беше обезбедено од Чешката агенција за развој заедно со македонската фирма Промедика.

„Промедика во своето делување останува посветена општествено одговорна компанија учествувајќи во донација на најсовремен инкубатор за потребите на Специјалната болница по гинекологија и акушерство „Мајка Тереза“ – Чаир, Скопје. Веруваме дека оваа донација значи многу за најмалите и најборбените пациенти, за нивните семејства и за целиот персонал којшто ги лекува овие бебиња,“ рече Маја Николовска, директор на Промедика.

Амбасада на Чешката Република во Скопје