Во период на Велигденските пости, пазарџиите во Скопје сведочат за драстично зголемување на продажбата на свежи печурки. Традиционално сметани за посна замена за месото, печурките стануваат сè попопуларен избор меѓу потрошувачите кои ги почитуваат постите.
На тезга на пазарот во Тафталиџе, пазарџиката Марија секојдневно продава свежи шампињони по цена од 220 денари за килограм.
„Од почетокот на постот, продажбата ми е зголемена. Секој ден продавам по околу 10 килограми печурки. Луѓето ги сакаат бидејќи се совршена замена за месото и можат да се подготват на многу начини”, изјави таа.
Марија се надева дека високата продажба на печурки ќе продолжи и по завршувањето на постите.
„Печурките не се само за пост. Тие се здрава и вкусна опција која може да се користи во различни јадења”, порача нашата соговорничка.
Потрошувачите исто така изразуваат задоволство од разновидноста и квалитетот на печурките на пазарот.
Ана, редовен купувач на пазарот во Тафталиџе, споделува:
„Секогаш барам здрави опции за моето семејство, а печурките се одличен избор. Тие се полни со нутриенти и лесно се подготвуваат”.
Од друга страна, месарниците се соочуваат со значително намалување на работата токму поради Велигденскиот пост.
Денар разговараше со вработен во месарница во Ѓорче Петров, кој сподели дека работата е падната за време на постите.
„Едвај чекаме да заврши овој период за да ни тргне бизнисот, бидејќи месо купуваат само оние кои не постат. Секоја година е исто. Луѓето се воздржуваат од месо и практикуваат алтернативи како што се печурките. Но, знаеме дека откако ќе заврши постот, побарувачката за месо повторно ќе се зголеми“, изјави месарот.
Овој феномен не е изолиран само за Скопје. По цела Македонија, печурките стануваат сè попопуларен избор за време на постите, што укажува на потенцијал за раст на овој сегмент на пазарот.
Со зголемената свест за здрава исхрана и почитувањето на традиционалните обичаи, печурките се издигнуваат како еден од најпродаваните производи на пазарите во Македонија за време на Велигденските пости, давајќи нов импулс на локалната економија.
Б.З.М.
