Американски војник се самозапали пред израелската амбасада во Вашингтон

 Американски воен пилот се замозапали пред израелската амбасада во Вашингтон во знак на протест против војната во Газа и во моментов е во критична состојба.

Човекот бил пренесен во болница откако пожарот бил изгаснат од припадници на американската тајна служба, соопшти противпожарната служба на Вашингтон.

Портпаролот на американските воздухопловни сили потврди дека во инцидентот бил вклучен активен воздухопловец.

„Повеќе нема да бидам соучесник во геноцид“, рекол мажот, облечен во униформа, во видео што го емитувал во живо на интернет, јави „Њујорк тајмс“. 

Тој потоа се полил со проѕирна течност и се запалил, извикувајќи „Слободна Палестина“, пишува „Тајмс“.

Локалната полиција и Тајната служба го истражуваат инцидентот.

Амбасадата на Израел е цел на тековните протести против војната во Газа.

Војната во Газа доведе до пропалестински и произраелски протести во САД.