Иако во најновиот извештај на Институтот за јавно здравје од 5-ти до 11-ти април се регистрирани 44 нови случаи на голема кашлица, сепак оваа бројка е за 10 проценти помала во однос на претходниот седумдневен период кога имаше 50 заболени.
Од новите 44 заболени, 2 лица се хоспитализирани.
Во однос на географската дистрибуција, најголем дел од случаите се пријавени во рамките на епидемијата во Скопје (n=37), а пријавени се случаи и во Битола (n=4) и по еден случај во Куманово, Кратово и Крива Паланка. Возраста на заболените се движи од 1 месец до 75 години, а најголем број на случаи се од возрасната група 10-14 години, се наведува во извештајот на ИЈЗ за периодот од 5 до 11 април
Заклучно со 11-ти април во Македонија се регистрирани 443 случаи на голема кашлица.
Најмногу има во Скопје – 355. Од заболените, хоспитализирани се 60 лица, а најголем дел деца до 4 години. Од вкупниот број заразени 263 или речиси 60 проценти не биле вакцинирани или не се комплетно вакцинирани.
По препораките од Комисијата за заразни болести и Институтот за јавно здравје, од 18-ти јануари започна интензивното пребарување на невакцинираните деца, со што кај оние кои е пропуштена вакцината и оние според редовниот календар за имунизација, од 18-ти јануари до 11-ти април годинава, дадени се над 39 илјади дози на вакцина која содржи компонента против голема кашлица.
Емилија Мисирлиевска